ដល់កម៉ង សូម្បីតែទឹកក៏ក្លែងបន្លំដែរ!!! ផលិតពីតំបន់ប៉ោយប៉ែតចេញទៅថៃ ហើយនាំចូលមកលក់ក្នុងទីផ្សារកម្ពុជាវិញ

បន្ទាយមានជ័យ៖ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានបង្គាប់ឱ្យសមត្ថកិច្ចជំនាញចាត់វិធានការស្រាវជ្រាវបង្ក្រាប ព្រោះសង្ស័យមានការផលិតពីតំបន់ប៉ោយប៉ែតចេញទៅថៃ ហើយនាំចូលមកលក់ក្នុងទីផ្សារកម្ពុជាវិញ ដែលធ្វើឱ្យប៉ះពាល់សុខភាពប្រពន្ធ កូន និង ពលរដ្ឋយើង ខណៈដែលទឹកបរិសុទ្ធម៉ាកសឹង្ហផលិតផលពីប្រទេសថៃ ដែលពលរដ្ឋកម្ពុជាខេត្តជាប់ព្រំដែនកម្ពុជា-ថៃ និយមចូលចិត្តបរិភោគ។ ការលើកឡើងដូចនេះ ធ្វើឡើងកាលពីចុងសប្តាហ៍កន្លងទៅនេះ ក្នុងពិធីគោរពទង់ជាតិរបស់ស្នងការដ្ឋាននគរបាលខេត្តបន្ទាយមានជ័យ។

ក្រៅពីការបញ្ជា និង លើកឡើងខាងលើ លោកបានបញ្ជាក់ឱ្យដឹងទៀតថា កន្លងមកមានហេតុការណ៍ដេញចាប់ករណីគ្រឿងញៀន រត់ចូលទីតាំងផលិតស្លាកសញ្ញាប្រេងម៉ាស៊ីនក្លែងក្លាយ ដោយយកយីហោម៉ាកសែលទៅបិទលើប្រេងម៉ាស៊ីនម៉ាកផ្សេងលក់បានថ្លៃ ហើយត្រូវបានបង្ក្រាប។ ដូចនេះត្រូវធ្វើយ៉ាងណាប្រឆាំងបទល្មើសសេដ្ឋកិច្ចឱ្យបាន ព្រោះវាមិនត្រឹមតែប៉ះពាល់សុខភាពទេ វាថែមទាំងធ្វើឱ្យប៉ះពាល់ផ្នែកសេដ្ឋកិច្ចពលរដ្ឋ និង ប្រទេសជាតិទៀតផង។

ទឹកបរិសុទ្ធម៉ាកសិង្ហ ជាផលិតផលរបស់ប្រទេសថៃ ត្រូវនាំចូលមកកម្ពុជាតាមគ្រប់ច្រក ជាពិសសនាំចូលតាមច្រកអន្តរជាតិប៉ោយប៉ែត ក្នុងមួយថ្ងៃៗរាប់យួរតាមរយៈរទេះអូរឆ្លងដែន ហើយនាំយកមកចែកចាយលក់ពេញទីផ្សារ ខេត្តបន្ទាយមានជ័យ បាត់ដំបង សៀមរាប៕