ពេលនេះប៉ូលិសឡើងវិលមុខហើយ!!! ចោរថាលួចតែ ៨០០ដុល្លារទេ តែម្ចាស់ផ្ទះថាបាត់ ៥០០០ដុល្លារឯណោះ ចុះបាត់៤២០០ដុល្លារទៅណា

ខេត្តកំពង់ធំ៖ នៅព្រឹកថ្ងៃទី០៧ ខែធ្នូ ឆ្នាំ២០១៧ មានចោរលួចរបស់យ៉ាងសកម្មចំនួន៣នាក់ត្រូវបានសមត្ថកិច្ចនគរបាលចាប់ខ្លួនបញ្ជូនទៅកាន់ស្នងការនគរបាលខេត្តដើម្បីសួរនាំ ។ ក្នុងនោះផងដែរ លោកអនុសេនីយ៍ឯក វ៉ាន់ វិបុរ អធិការនគរបាលក្រុងស្ទឹងសែនបានប្រាប់ឲ្យដឹងថាករណីចោរកម្មខាងលើនេះបានកើតឡើងស្ថិតនៅចំណុចលើផ្ទះជនរងគ្រោះឈ្មោះ មួយ ហុង ភេទស្រី អាយុ៥០ឆ្នាំ រស់នៅភូមិពោធិបាក់ករ សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ។

ក្នុងនោះផងដែរគាត់បានប្តឹងថា មានចោរបន្លំចូលផ្ទះគាត់លួចយកការបូបលុយបាត់អស់ទូរស័ព្ទដៃម៉ាកសាំសុង១គ្រឿង លុយដុល្លា១៦៧០ដុល្លារ និងលុយខ្មែរប្រហែលជា១៣លានរៀល សរុបប្រហែល៥០០០ដុល្លារ រួចគេចខ្លួនបាត់ ខណៈរូបគាត់កំពុងតែធ្វើម្ហូបនៅខាងក្រោយផ្ទះត្រូវចោរចូលលួចតាមទ្វារខាងមុខផ្ទះ។

ក្រោយពីពីទទួលបានពាក្យបណ្តឹងរបស់ជនរងគ្រោះសមត្ថកិច្ចបានចុះទៅដល់ផ្ទះជនរងគ្រោះសួរនាំតាមការបំភ្លឺពីស្ត្រីរងគ្រោះសមត្ថកិច្ចបានធ្វើការស្រាវជ្រាវ និងតាមដានមើលតាមកាមេរ៉ាសុវត្ថិភាពទើបអាចកំណត់មុខសញ្ញាបានពេលនោះដោយមានការសម្របសម្រួលពីលោក អ៊ិត សុធា ព្រះរាជអាជ្ញាអមសាលាតំបូងខេត្តកំពង់ធំ កម្លាំងនគរបាលក្រុងស្ទឹងសែន កម្លាំងជំនាញនៃស្នងការខេត្ត បានសហការជាមួយនឹងកម្លាំងនគរបាលប៉ុស្តិ៍ព្រៃគុយចុះធ្វើការឃាត់ខ្លួនបានជនសង្ស័យបានចំនួន៣នាក់ដល់លំនៅដ្ឋានតែម្តង ។

ចំពោះជនសង្ស័យទី ១-ឈ្មោះ ផុន ចាន់ ភេទប្រុស អាយុ២៣ឆ្នាំ, ទី២-ឈ្មោះ ចិត្ត សុចាន់ ភេទប្រុសអាយុ២៥ឆ្នាំ និងទី៣-ឈ្មោះ ធន់ ទី ភេទប្រុស អាយុ២០ឆ្នាំ អ្នកទាំង៣នាក់រស់នៅភូមិព្រៃគុយ ឃុំព្រៃគុយ ស្រុកកំពង់ស្វាយ ។ ដោយនៅចំពោះមុខសមត្ថកិច្ចជនសង្ស័យឈ្មោះ ផុន ចាន់ បានសារភាពថា ខ្លួនពិតជាបានធ្វើសកម្មភាពចូលលួចយកការបូបលុយស្ត្រីរងគ្រោះខាងលើពិតប្រាកដមែន ហើយលុយទាំងអស់ដែលគេលួចបាននោះមានចំនួនប្រហែលជាង៨០០ដុល្លារតែប៉ុណ្ណោះមិនមានច្រើនរហូតដល់ទៅ៥០០០ដុល្លារដូចដែលគាត់ថា បាត់នោះទេ ចំណែកការលួចនេះគឺគេបានបន្លំចូលលួយតែម្នាក់ឯងទេមិនមានជាប់ពាក់ព័ន្ធជាមួយពីរនាក់ទៀតនោះឡើយ ៕