ក្តៅៗ សម្រាប់អ្នកលក់ឡេលាប គ្មានរូបមន្ត និងប្រភពច្បាស់លាស់ ឲ្យបញ្ឈប់ជាបន្ទាន់ បើមិនដូចនេះទេគឺចប់ហើយ

ក្នុងឱកាសចុះចែកសេចក្តីជូនដំណឹងរបស់មន្ទីរសុខាភិបាលខេត្ត ជូនដល់អាជីវករលក់គ្រឿងសំអាងនៅផ្សារចាស់ ផ្សារសាមគ្គី និងផ្សារលើធំថ្មី ក្នុងក្រុងសៀមរាប នៅថ្ងៃទី១៧ ខែមករា ឆ្នាំ២០១៨នេះ លោកស្រី លី វណ្ណៈ ប្រធានការិយាល័យឱសថនៃមន្ទីរសុខាភិបាលខេត្តសៀមរាបបានមានប្រសាសន៍ថា ការចែកជូនសេចក្តីជូនដំណឹងនេះ គឺអនុវត្តទៅតាមសេចក្តីជូនដំណឹងរបស់ក្រសួងសុខាភិបាល និងសេចក្តីជូនដំណឹងរបស់មន្ទីរសុខាភិបាល ក៏ដូចជាអនុក្រិត្យរបស់រាជរដ្ឋាភិបាល ស្តីអំពីការគ្រប់គ្រងគ្រឿងសំអាង ទប់ស្កាត់ឱ្យបានការផលិត ការលក់និងធ្វើចរាចរណ៍នៅលើទីផ្សារ នូវផលិតផលប្រភេទឡេលាយលាបស្បែកដែលគ្មានប្រភពនិងរូបមន្តច្បាស់លាស់ និងគ្មានការអនុញ្ញាតិពីក្រសួងសុខាភិបាល ។

លោកស្រី លី វណ្ណៈ មានប្រសាសន៍ទៀតថា បន្ទាប់ពីចែកជូនសេចក្តីដំណឹងដោយផ្ទាល់ដល់អាជីវករ និងជូនដំណឹងតាមប្រពន្ឋ័ផ្សព្វផ្សាយមានវិទ្យុនិងទូរទស្សន៍រួចហើយ ហើយបើអាជីវករណានៅតែបន្តដាក់លក់នូវឡេលាយគ្មានរូបមន្ត និងគ្មានប្រភពច្បាស់លាស់ទៀត យើងនឹងសហការជាមួយសមត្ថកិច្ចចាត់វិធានការរដ្ឋបាលទៅតាមច្បាប់ស្តីពីការគ្រប់គ្រងឱសថនិងគ្រឿងសំអាង ដូច្នេះតាមរយៈនេះ សូមសំណូមពរនិងអំពាវនាវដល់អាជីវករ ដែលលក់ឡេលាយលាបស្បែកដែលគ្មានការអនុញ្ញាតពីក្រសួងសុខាភិបាល គ្មានរូបមន្តនិងគ្មានប្រភពច្បាស់លាស់ទាំងអស់ បញ្ឈប់ជាបន្ទាន់ ចៀសវាងមានបញ្ហាប្រឈមទៅនឹងផ្លូវច្បាប់។

តាមខ្លឹមសារនៃសេចក្តីជូនដំណឹងរបស់មន្ទីរសុខាភិបាលខេត្តសៀមរាប ចុះថ្ងៃទី៨ ខែមករា ឆ្នាំ២០១៨នេះ បានបញ្ជាក់ថា តាមការស្រាវជ្រាវរបស់ក្រុមការងារត្រួតពិនិត្យឱសថ ចំណីអាហារ និងគ្រឿងសំអាងរបស់មន្ទីរសុខាភិបាល និងសេចក្តីរាយការណ៍របស់អាជ្ញាធរដែនដី ជាពិសេសប្រជាពលរដ្ឋក្នុងខេត្តសៀមរាប បានឲ្យដឹងថា នៅតាមផ្សារនានាក្នុងខេត្ត មានលក់និងចែកចាយប្រភេទឡេលាយ ដោយគ្មានប្រភព និងរូបមន្តច្បាស់លាស់ និងគ្មានការអនុញ្ញាតិពីក្រសួងសុខាភិបាល ដែលធ្វើឱ្យប៉ះពាល់ដល់សុខភាពស្បែក ដូចជាប្រតិកម្មស្បែក និងក្នុងករណីធ្ងន់ធ្ងរអាចបណ្តាលឱ្យគ្រោះថ្នាក់ដល់ជីវិត ។

ដោយអនុលោមតាមច្បាប់ស្តីពីការគ្រប់គ្រងឱសថនិងគ្រឿងសំអាង មន្ទីរសុខាភិបាលមានវិធានការ និងស្នើដល់គ្រប់អាជីវករ ផលិតនិងលក់ឡេលាយតាមផ្សារនានាក្នុងខេត្ត និងអ្នកលក់តាមអនឡាញ សូមបញ្ឈប់ជាបន្ទាន់ នូវការដាក់តាំងលក់ និងផ្សព្វផ្សាយលក់ឡេលាយដែលគ្មានប្រភព និងរូបមន្តច្បាស់លាស់ និងគ្មានការអនុញ្ញាតិពីក្រសួងសុខាភិបាលចាប់ពីថ្ងៃជូនដំណឹងនេះតទៅ។

បន្ទាប់ពីសេចក្តីជូនដំណឹងនេះហើយ មន្ទីរសុខាភិបាលខេត្តនឹងសហការជាមួយសមត្ថកិច្ច ចាត់វិធានការរដ្ឋបាលយ៉ាងតឹងរឹងតាមផ្លូវច្បាប់ ចំពោះអាជីវករណានៅតែបន្តលក់ឡេលាយលាបស្បែក ដើម្បីចៀសវាងឱ្យបានពីផលប៉ះពាល់នៃឡេលាយដល់សុខភាពប្រជាជនក្នុងខេត្ត ៕

ប្រភព​៖ មន្ទីរព័ត៌មានខេត្តសៀមរាប