នៅពេលលោក ដូណាល់ ត្រាំ ឃើញរូបនេះហើយ អាចចុកឈាម ដោយសារផ្សារទំនើបចិន ដំឡើងរូបឆ្កែ ស្រដៀងរូបលោក (មានវីដេអូ)

ផ្សារទំនើបមួយនៅភាគខាងជើងប្រទេសចិន បានដំឡើងចម្លាក់ឆ្កែដ៏ធំសម្បើមដែលនរណាៗក៏បានដឹងថា វាមានសណ្ឋានដូចជាប្រធានាធិបតីអាមេរិក លោក ដូណាល់ ត្រាំ ដើម្បីស្វាគមន៍ឆ្នាំថ្មី ឆ្នាំចដែលនឹងមកដល់នាពេលខាងមុខ។

ចម្លាក់ឆ្កែដ៏ស្កឹមស្កៃនៅពីមុខផ្សារទំនើបក្នុងទីក្រុងតៃយួន ខេត្ដសានស៊ី ប្រទេសចិន មានភិនភាគដូចលោក ដូណាល់ ត្រាំ ត្រង់ម៉ូដសក់ព្យែរពណ៌ទឹកមាស ចិញ្ចើមជ្រុង និងបង់កជាមួយកន្សែងក្រហម ព្រមទាំងលើកចង្អុលដៃឡើង ដែលត្រូវបានគេមើលឃើញយ៉ាងច្បាស់ក្រឡែតថាជាកាយវិការរបស់លោក ត្រាំ។

ដោយសារលោកប្រសូតក្នុងឆ្នាំ ១៩៤៦ លោក ដូណាល់ ត្រាំ ដែលត្រូវបានចោទប្រកាន់ជាអ្នកកាន់អំណាចពូកែខាងព្រូសកោកៗតែមិនដែលខាំ គឺជាសត្វឆ្កែស្ថិតក្នុងឆ្នាំទាំង ១២ របស់ចិន ដោយលោកមានសែស្រឡាយក្នុងឆ្នាំដូចគ្នាជាមួយអតីតប្រធានាធិបតីអាមេរិកលោក George W. Bush និង Bill Clinton។

ចំពោះអ្នកដែលប្រសូតក្នុងឆ្នាំច យោងតាមហោរាសាស្ដ្រចិន បានបង្ហាញថា ពួកគេជាបុគ្គលស្មោះត្រង់ និងមានភក្ដីភាពចំពោះគ្នាបំផុត ព្រមទាំងជាមនុស្សប្រកាន់នូវយុត្ដិធម៌ក្នុងចិត្ដជាប់ជានិច្ច។ ប៉ុន្ដែពួកគេក៏ជាមនុស្សក្បាលរឹង ចិត្ដស្រាល និងឆាប់ខឹង។

កាលពីឆ្នាំមុន ផ្សារទំនើបមួយនេះ ក៏បានដំឡើងរូបមាន់គកស្រដៀងលោក ត្រាំ ដែលនាំឲ្យមានការចម្លងតាមជាច្រើន រួមទាំង ប៉េងប៉ោងមាន់យក្សនៅក្បែរសេតវិមានក្នុងរដូវក្ដៅឆ្នាំនេះ៕