ដោយសារតែរឿង "បុព្វេសន្និវាស"​ ល្បីខ្លាំងពេក រហូតធ្វើឲ្យលោក កៅ សីហា អ្នកដឹកនាំបទចម្រៀង រស្មីហង្សមាស ទ្រាំលែងបានក៏បង្ហោះសារមួយនេះឡើង

​រឿង​ភាគ​បុរាណ​ថៃ "បុព្វេសន្និវាស (Buppe San Nivas)"​ កំពុង​ទទួល​ការ​គាំទ្រ​ពី​សំណាក់​អ្នក​គាំទ្រ​ជា​ច្រើន​ជុំ​វិញ​តំបន់​អាស៊ី​នា​ពេល​បច្ចុប្បន្ន​ រហូតបានធ្វើឲ្យលោក កៅ សីហា ដែលជាអ្នកដឹកនាំបទចម្រៀងប្រចាំផលិតកម្មរស្មីហង្សមាសដ៏ល្បីល្បាញមួយរូប បង្ហាញនូវអារម្មណ៍ពិតរបស់លោកតាមរយៈសារមួយខ្សែដែលលោកបានសរសេរក្នុងហ្វេសប៊ុករបស់លោកទាក់ទងរឿងមួយនេះ ដោយលោកបានលើកឡើងថា៖

"បុព្វេសន្និវាស របស់ថៃ បានបើកបង្ហាញទីតាំងតំបន់ទេសចរប្រវត្តិសាស្រ្តរបស់គេយ៉ាងអស្ចារ្យ ។ គេបានទាក់ទាញភ្ញៀវបរទេសឲ្យមកលេងតំបន់អាយុធ្យាកើនឡើងជាលំដាប់តាមរយៈខ្សែរភាពយន្តភាគមួយនេះ។ នេះមិននិយាយដល់ទម្រង់សម្លៀកបំពាក់ ការបង្ហាញវប្បធម៌ ប្រពៃណីនានាដែលគេបានបញ្ចូលបង្ហាញនៅឡើយផង។ ទាំងនេះក៏ដោយសារតែ អាជ្ញាធរសាសន៍គេយល់ពីប្រយោជន៍ជាតិជាធំ ដែលគេបានសហការគ្នានិងក្រុមផលិតឲ្យដំណើរការថតបានយ៉ាងរលូននៅទីតាំងទេសចរប្រវត្តិសាស្រ្តនានារបស់គេ។ 

ហើយពេលនេះរដ្ឋាភិបាលរបស់គេបានជម្រុញ និងលើកទឹកចិត្តឲ្យបន្តផលិតរឿងដែលបង្ហាញទីតាំងទេសចរនានាឲ្យកាន់តែច្រើនថែមទៀត ដើម្បីពង្រីកឥទ្ឋិពលនៃតំបន់ទេសចររបស់គេកាន់កើនទ្វេរ។ ងាកមកខ្មែរយើងវិញ បើសិនចង់ថតនៅតាមតំបន់ទេសចរប្រវត្តិសាស្ត្រនានា គឺមហាលំបាក លំបាកយកតែមែនទែន គឺត្រូវឆ្លងលិខិតច្រើនដំណាក់កាល ច្រើនផ្នែកជាមួយអន្តរក្រសួង និងស្ថាប័នដែលពាក់ព័ន្ឋ។ កុំថាឡើយដល់តំបន់ប្រាសាទ សូម្បីតែសួនច្បារនានាតាមទីក្រុងក៏ដោយ ក៏មិនបានផង បើគ្មានច្បាប់ ឬលិខិតពីសាលាក្រុង និងក្រសួងពាក់ពន្ឋ័។

ថាណ្ហើយ! ដល់តែពេលបែកធ្លាយរូបថតស្រាតនានារបស់ជនបរទេសដែលថតនៅប្រាសាទនានាវិញ អ្នកណាម្នាក់ក៏អត់ដឹងរឿងដែរ គឺអត់ចឹងហ្មង! គ្រប់ផលិតករខ្មែរសុទ្ឋតែជួបបញ្ហានឹងដូចៗគ្នា ..... ប្រសិនបើមានការយោគយល់បន្ឋូរបន្ថយភាពតានតឹងអស់នឹងមួយចំណែក ប្រហែលជាការបង្ហាញតំបន់ប្រាសាទនានា ដែលជាទីកន្លែងទេសចរដល់ភ្នែកបរទេសបានច្រើនជាងនេះ ហើយសក្ដានុពលនៃឧស្សាហកម្មគ្មានផ្សែងក៏នឹងកើនឡើងផងដែរ។ ដោយការគោរព"៕

តើអ្នកទាំងអស់គ្នាយល់យ៉ាងម៉េចដែរចំពោះការលើកឡើងរបស់លោក កៅ សីហា?