ពេលបានអានប្រត្តិពិតរបស់ តារាកំប្លែង នាយ ក្រឹម និងកូនរបស់គាត់ទាំងបួននាក់ហើយ បានដឹងថាអស្ចារ្យមែន (មានវីដេអូ)

ការប្រើពេលស្ទើរពេញមួយជីវិតនៅលើវិថីសិល្បៈ ទស្សនិកជនបានស្គាល់តារាកំប្លែងជើងចាស់ឈរលំដាប់កំពូលជាច្រើនជំនាន់នាយ ក្រឹម ត្រឹមតែភាពក្រមិចក្រមើមកំប្លុកកំប្លែងនៅលើឆាកប៉ុណ្ណោះ តែបើមុជឲ្យជ្រៅជាងនេះ ទើបដឹងថា តារាកំប្លែងរូបនេះបានប្រើជីវិតជាអ្នកកំប្លែងក្នុងការជំរុញ និងបណ្តុះកូនខ្លួនឲ្យទទួលបានការសិក្សាថ្នាក់ខ្ពស់សុទ្ធតែសាលាអន្តរជាតិ ហើយកូនរបស់នាយក្រឹម ម្នាក់បានទទួលសញ្ជាតិអាមេរិក។

ដោយក្តីស្រឡាញ់អាជីពសិល្បៈកំប្លែង ឆ្លងកាត់ការប្រឡងជាច្រើនដំណាក់កាល ទីបំផុតលោក អ៊ូ ប៊ុនណ្ណារ៉ាត់ ដែលលោកអ្នកស្គាល់ច្បាស់ត្រឹមតែឈ្មោះក្រៅថា «នាយក្រឹម» នោះ បានហក់ចូលប្រឡូកនៅក្នុងវិស័យសិល្បៈនៅក្នុងឆ្នាំ១៩៨២។

តើប្រវត្តិពិតរបស់តារាកំប្លែងរូបនេះយ៉ាងណា? តើលោកមានអាថ៌កំបាំងអ្វីខ្លះក្នុងគ្រួសារ?

ទោះបីជាបច្ចុប្បន្ន លោក អ៊ូ ប៊ុនណ្ណារ៉ាត់ ហៅនាយ ក្រឹម រស់នៅក្នុងភូមិ ទួលគោក សង្កាត់ ទួល សង្កែ ខណ្ឌ ឫស្សីកែវ រាជធានីភ្នំពេញ ក៏ដោយ តែលោកមិនមែនជាអ្នកមានកំណើតនៅភ្នំពេញទេ។ នាយក្រឹម កើតនៅថ្ងៃទី១៣ កុម្ភៈ ឆ្នាំ១៩៦១ លោកជាអ្នកភូមិថ្មី សង្កាត់ តាខ្មៅ ក្រុងតាខ្មៅ ខេត្តកណ្ដាល។

នាយមានឪពុកឈ្មោះ អ៊ូ ប៉ុន អតីតវេជ្ជបណ្ឌិតផ្នែករោគសរសៃ ប្រសាទនៅមន្ទីរពេទ្យជ័យ ជម្នះ ក្រុងតាខ្មៅ (ស្លាប់ក្នុងរបបប៉ុលពត) រីឯម្ដាយឈ្មោះ ម៉ី ថុន អាយុ ៧៣ ឆ្នាំ រស់នៅសហរដ្ឋអាមេរិក។

នាយក្រឹមជាកូនពៅនៅក្នុងគ្រួសារដ៏ធំមួយដែលមានបងប្អូនចំនួន ១២ នាក់ (ប្រុស ៥ ស្រី ៧)។ បងប្អូនរបស់លោក បច្ចុប្បន្ននៅរស់ ៥ នាក់ ស្លាប់ ៣ និងបាត់ខ្លួននៅក្នុងរបបខ្មែរក្រហមចំនួន ២ នាក់។ រីឯការសិក្សា តារាកំប្លែងរូបនេះ បានបញ្ចប់ត្រឹមថ្នាក់ទី១២ នៅវិទ្យាល័យតាខ្មៅ ខេត្តកណ្តាល។

ដោយសារមានឈាមជ័រជាអ្នកសិល្បៈតែម្នាក់ឯងនៅក្នុងចំណោមបងប្អូន១២នាក់ នាយ ក្រឹម ក៏បានចងក្រងសម្ព័ន្ធស្នេហាជាមួយនឹងនារីក្នុងសិល្បៈម្នាក់ដែរ ហើយលោកក៏បានរៀបអាពាហ៍ពិពាហ៍នៅក្នុងឆ្នាំ១៩៨២ ជាមួយអ្នកស្រី ឡុង មន្នី អតីតជាអ្នករាំរបាំរបស់ស្ថានីយទូរទស្សន៍ជាតិកម្ពុជា។ ក្រោយទទួលបានកូនម្នាក់ ប្រពន្ធរបស់លោកក៏ឈប់ពីសិល្បៈមកធ្វើជាមេផ្ទះវិញ។ រហូតមកទល់នឹងពេលនេះលោក និងភរិយាមានកូនប្រុសស្រី៤នាក់ ក្នុងនោះស្រីម្នាក់ និង ប្រុស៣នាក់។

ទស្សនិកជនមិននឹកស្មានថា កូនទាំង៤របស់តារាកំប្លែងរូបនេះគ្មានអ្នកណាម្នាក់ស្នងតំណែងរបស់លោកឡើយ។

នាយក្រឹមបាននិយាយថា៖ «ខ្ញុំមិនមែនហាមឃាត់ពួកគេមិនឲ្យចូលសិល្បៈទេ តែខ្ញុំមិនដឹងថា ហេតុអីបានជាគេមិនចូលចិត្តសិល្បៈទេ ធ្វើម៉េចបើពួកគេអត់ចង់ តែយ៉ាងណាខ្ញុំបានជំរុញឲ្យកូនខ្ញុំទាំងអស់បានរៀនសូត្រមានចំណេះដឹងគ្រប់ៗគ្នា»។

កូនទាំងបួនរបស់តារាកំប្លែងល្បីជើងចាស់រូបនេះក្នុងនោះកូនស្រីទី១ឈ្មោះ អ៊ូ ប៉ុនមន្នីរៈ អាយុ ២៩ឆ្នាំ បានបញ្ចប់ថ្នាក់អនុបណ្ឌិតផ្នែកធនាគារ។ កូនប្រុសទី២ អ៊ូ ប៉ុនមន្នីរិទ្ធឹស្យា និស្សិតនៅសាកលវិទ្យាល័យបញ្ញាសាស្ត្រ។ កូនប្រុសទី៣ អ៊ូ ប៉ុនមន្នីអាឡែន ប្រុស សិក្សានៅសាលា ICS។ កូនប្រុសទី៤ អ៊ូ ប៉ុនមន្នីដាញែល រៀននៅសាលា Northbridge ។

ដោយសារកូនៗសុទ្ធតែរៀននៅថ្នាក់ខ្ពស់ និងសាលាអន្តរជាតិ បែបនេះនាយក្រឹមបានឲ្យដឹងថា នោះមិនមែនជារឿងងាយស្រួលឡើយ។

លោកនិយាយថា៖«បើនិយាយពីរឿងនេះ វាមហាពិបាកណាស់ តែខ្ញុំត្រូវតែប្រឹងឲ្យពួកគេបានរៀនសូត្រគ្រប់គ្នា»។

លោកបានបញ្ជាក់ថា៖«រាល់ការចំណាយសម្រាប់ពួកកូនៗរបស់ខ្ញុំទាំងប៉ុន្មាននោះ គឺសុទ្ធតែលុយកាក់បានមកសិល្បៈទាំងស្រុង គ្មានលុយណាផ្សេងនោះទេ»។

តារាកំប្លែងជើងចាស់រូបនេះបានឲ្យដឹងថា កូនលោកទាំង៤នាក់ សុទ្ធតែទទួលបានសិទ្ធិ ទៅរស់នៅសហរដ្ឋអាមេរិកទាំងអស់គ្នា ហើយមានម្នាក់ទទួលបានសញ្ជាតិអាមេរិក ដោយសារតែគេបានកើតនៅលើទឹកដីអាមេរិក នៅពេលលោក និងភរិយា ទៅលេង និងសម្តែងនៅទីនោះ។ តែមកទល់នឹងពេលនេះ មិនទាន់មានអ្នកណាម្នាក់បានចេញទៅរស់នៅអាមេរិកនៅឡើយ ដោយលោកបានបញ្ជាក់ថា លោកមានការបារម្ភច្រើនចំពោះកូនៗនៅពេលពួកគេរស់នៅឆ្ងាយពីការគ្រប់គ្រងរបស់លោក។

តារាកំប្លែងដែលពាក់ស័ក្តិប្រាំលើស្មារូបនេះបាននិយាយថា៖«ខ្ញុំមិនចង់ឲ្យពួកគេទៅរស់នៅទីនោះ ឆ្ងាយពីខ្ញុំទេ ខ្លាចវាពិបាកនៅពេលនៅឆ្ងាយពីម៉ែឪនោះ»។

ទោះបីជាលោកជាតារាជើងចាស់ តែតារារូបនេះ ក៏មិនមែនហក់ចូលសិល្បៈទាំងដំឡូងមូលដែរ ពោលគឺលោកបានទទួលការប្រឡងប្រជែងក្នុងកម្មវិធីរបស់ស្ថានីយ វិទ្យុជាតិកម្ពុជាកាលពីឆ្នាំ១៩៨២ ក្នុងចំណោមបេក្ខភាព១០០នាក់។ អស់រយៈប្រហែល ៣០ឆ្នាំ នៅក្នុងពិភពសិល្បៈកំប្លែង នាយ ក្រឹម នៅតែជាចំណីអារម្មណ៍មិនអាចបាត់បង់របស់ទស្សនិកជន។ ក្រៅពីការងារសិល្បៈ នាយ ក្រឹម បម្រើការងារកងអង្គរក្សរបស់លោកនាយករដ្ឋមន្ត្រី ហ៊ុន សែន ដែលពេលនេះមានឋានន្តរស័ក្ដិវរសេនីយ៍ឯក (ស័ក្តិ៥) ។

ក្នុងអាជីពកំប្លែងជាច្រើនជំនាន់នេះ នាយក្រឹម ធ្លាប់ទៅសហរដ្ឋអាមេរិកចំនួនពីរលើកនៅឆ្នាំ១៩៩២ និងឆ្នាំ២០០៤ ។ ប្រទេសអូស្ត្រាលី ម្តងនៅឆ្នាំ១៩៩៣។ ប្រទេសបារាំង ម្តងនៅឆ្នាំ២០០០ និងប្រទេសស្វ៊ីសម្តង៕