យាយរវល់ទៅផ្សារ ទុកចៅប្រុស២នាក់ក្នុងផ្ទះ បណ្តាលឲ្យមានអគ្គិភ័យឆាបឆេះ ដោយរងរបួសរលាកពេញខ្លួនយ៉ាងធ្ងន់ធ្ងរ (មានវីដេអូ)

ក្មេងប្រុសតូចអាយុប្រមាណ ៥ឆ្នាំ ចំនួន ២នាក់ បានរងរបួសរលាកពេញខ្លួនធ្ងន់ធ្ងរ ក្នុងហេតុការណ៍អគ្គិភ័យឆាបឆេះផ្ទះ ១កន្លែង ​​ជិតអតីតសាកលវិទ្យាល័យ​ន័រតុន កាលពីវេលាម៉ោង ២ និង ៣០នាទី រសៀលថ្ងៃទី១៥ ខែមករា ឆ្នាំ២០១៨ នេះ នៅចំណុចផ្ទះលេខ២៧BE4 ជាន់ទី៤ ផ្លូវ១៩ ភូមិ១០ សង្កាត់ផ្សារចាស់ ខណ្ឌដូនពេញ រាជធានីភ្នំពេញ ។

ក្មេងប្រុសរងគ្រោះទាំង ២នាក់ ខាងលើមានឈ្មោះ ១. ផាន់ សុខសំណាង អាយុ ៥ឆ្នាំ ឪពុកឈ្មោះ រឿង រឿម និងម្តាយឈ្មោះ ឆៃសុខ លី, ២. ផាន់ ភាងចិន អាយុ ៥ឆ្នាំ ឪពុកឈ្មោះ ភាង ស៊ីធូ ម្តាយឈ្មោះ ផាំង ស្រីណេត ។ បើតាមប្រភពព័ត៌មាននៅកន្លែងកើតហេតុ បានឲ្យដឹងថា ម្ចាស់ផ្ទះរងគ្រោះមានឈ្មោះ ផាន់ ណារ៉េត មុខរបរ យោធា ស្នាក់នៅផ្ទះលេខ២៧BE4 ជាន់ទី៤ ផ្លូវ១៩ ភូមិ១០ សង្កាត់ផ្សារចាស់ ខណ្ឌដូនពេញ រាជធានីភ្នំពេញ ។

នៅមុនពេលកើតហេតុ ឪពុកម្ដាយរបស់ក្មេងប្រុសរងគ្រោះទៅធ្វើការបាត់ ដោយទុកកូនប្រុស ២នាក់​ នៅជាមួយជីដូន ពេលនោះ ជីដូនរវល់ទៅផ្សារ ក៏បានចាក់សោពីក្រៅទុកចៅ​ នៅ​ក្នុងផ្ទះ ស្រាប់តែមួយសន្ទុះក្រោយមក មានបងប្អូនប្រជាពលរដ្ឋនៅក្បែរនោះ ឃើញផ្សែងហុយចេញពីក្នុងផ្ទះខ្មួលខ្មាញ់ ក៏បានរាយការណ៍ជូនសមត្ថកិច្ចមូលដ្ឋានជួយអន្តរាគមន៍ ហើយសមត្ថកិច្ចមូលដ្ឋាន ក៏បានរាយការណ៍បន្តទៅសមត្ថកិច្ចជំនាញ និងប្រជាការពារខណ្ឌ ចុះជួយអន្តរាគមន៍ភ្លាមៗ ដោយជួយសង្គ្រោះក្មេងប្រុស ២នាក់ រួចផុតពីសេចក្ដីស្លាប់ ប៉ុន្ដែ បានរងរបួសធ្ងន់ត្រូវបញ្ជូនទៅមន្ទីរពេទ្យគន្ធបុប្ផាទី៤ ។

​ក្នុងហេតុការណ៍គ្រោះអគ្គិភ័យខាងលើនេះ សមត្ថកិច្ចបានប្រើប្រាស់រថយន្តពន្លត់អគ្គិភ័យ ​ចំនួន ៥គ្រឿង ប្រើប្រាស់ទាំងអស់ ។ ​សមត្ថកិច្ចសន្និដ្ឋានជំហានដំបូងថា អាចមកពីឆ្លងចរន្តអគ្គិសនី ទើបបង្កជាអគ្គិភ័យឆាបឆេះបែបនេះ ៕