សូមមេត្តាប្រុងប្រយ័ត្ន!!! ដាច់ធ្លាក់ទោងយោល នៅក្នុងមជ្ឈមណ្ឌល កោះពេជ្រ ដោយបណ្តាលឲ្យរងរបួសធ្ងន់ម្នាក់ និងស្រាល៣នាក់ (មានវីដេអូ)

ភ្នំពេញ៖ មានហេតុការណ៏ដ៏គួរឲ្យភ្ញាក់ផ្អើលជាខ្លាំងមួយបានកើតឡើង កាលពីវេលាម៉ោង០៧ និង៣០នាទីយប់ ថ្ងៃទី២៧ ខែកុម្ភៈ ឆ្នាំ២០១៨ តាមបណ្តោយផ្លូវបេតុងគ្មានលេខ ក្នុងមជ្ឃមណ្ឌលកោះពេជ្រ ស្ថិតនៅចំណុចកន្លែងក្មេងលេង ក្នុងសង្កាត់ទន្លេបាសាក់ ខណ្ឌចំការមន ដោយមានទោងយោល នៅក្នុងមជ្ឈមណ្ឌលកោះពេជ្រ បានដាច់គន្លឹះធ្លាក់ ខណៈក្មេងប្រុសស្រីជាបងប្អូន៤នាក់បាននាំគ្នាឡើងជិះ បណ្តាលឲ្យរងរបួសធ្ងន់ម្នាក់ និងស្រាល៣នាក់។

នៅមុនពេលដែលបានកើតហេតុ គេបានឃើញក្មេងប្រុសស្រីចំនួន៤នាក់ត្រូវជាបងប្អូននឹងគ្នា បាននាំគ្នាទៅទិញ សំបុត្រ ជិះទោងយោលដោយប្រើម៉ាស៊ីនយោលទៅវិញទៅមក ខណៈពេលពួកគេកំពុងតែជិះយ៉ាងសប្បាយក៏ស្រាប់តែដាច់គន្លឹះបណ្ដាលឲ្យធ្លាក់ក្មេងទាំង៤នាក់នោះរងរបួសក្មេងស្រីម្នាក់របួសធ្ងន់ចំដៃ ហើយក៏ត្រូវបានគេដឹកបញ្ចូនទៅកាន់មន្ទីរពេទ្យនៅក្បែរកន្លែងកើតហេតុ ចំណែកឯ៣នាក់ទៀតរងរបួសស្រាល ។

ក្នុងករណីមួយនេះ ចេះសំណាងល្អហើយដែលមនុស្សជិះតិចចុះ បើមានមនុស្សជិះច្រើននាក់វិញមិនដឹងជាមានអ្នករងរបួសប៉ុន្មាននាក់ទេ ។ ក្រោយពេលកើតហេតុ ម្ចាស់ទោងយោលនេះបានសន្យាថា នឹងធានាចេញថ្លៃថ្នាំពេទ្យឲ្យក្មេងដែលរងរបួសទាំងអស់ ៕