អ្នកខុសទិន្នន័យអត្តសញ្ញាណប័ណ្ណ សំបុត្រកំណើត ពេលនេះឈប់បារម្មណ៍ទៅ ព្រោះមានវិធីសាស្ត្រហើយ (សូមអានសេចក្តីលម្អិតខាងក្នុង)

អគ្គនាយកដ្ឋានអត្តសញ្ញាណកម្ម បានប្រកាសថា សាធារណជន ដែលមានបំណងស្នើសុំកែតម្រូវ ឬធ្វើមោឃភាពទិន្នន័យនៃបញ្ជីអត្រានុកូលដ្ឋាន សាមីខ្លួន ឬអាណាព្យាបាល ឬញាតិ ដែលរស់នៅក្នុងផ្ទះជាមួយ អាចមកដាក់ពាក្យស្នើសុំកែតម្រូវ ឬមោឃភាពទិន្នន័យអត្រានុកូលដ្ឋានរបស់ខ្លួន នៅរៀងរាល់ម៉ោងធ្វើការ។

ការដាក់ពាក្យស្នើសុំកែទិន្នន័យនៃបញ្ជីអត្រានុកូលដ្ឋាននោះ ត្រូវធ្វើឡើង នៅទីតាំង២ គឺ៖

ទី១- នៅនាយកដ្ឋានអត្រានុកូលដ្ឋាន នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ ដែលមានអាសយដ្ឋាន នៅផ្លូវជាតិលេខ១ សង្កាត់និរោធ ខណ្ឌច្បារអំពៅ រាជធានីភ្នំពេញ ( ទល់មុខបុរី ប៉េង ហួត បឹងស្នោរ )

ទី២- នៅសាលាក្រុង ស្រុក ខណ្ឌ នៃទីតាំង ដែលបញ្ជីអត្រានុកូលដ្ឋានរបស់សាមីខ្លួន បាននិងកំពុងរក្សាទុក។

សេចក្ដីជូនដំណឹង ចុះថ្ងៃទី៨ ខែវិច្ឆិកា ឆ្នាំ២០១៧ បានគូសបញ្ជាក់ថា រាល់ការស្នើសុំកែតម្រូវ ឬមោឃភាព សូមភ្ជាប់មកជាមួយនូវសំណុំឯកសារពាក់ព័ន្ធ ដែលជាកម្មវត្ថុនៃការស្នើសុំកែតម្រូវ ឬមោឃភាពនោះ មកជាមួយផង។

សូមបញ្ជាក់ថា ការប្រកាសទទួលកែតម្រូវទិន្នន័យនៃបញ្ជីអត្រានុកូលដ្ឋាននេះ បានធ្វើឡើង ខណៈដែលអគ្គនាយកដ្ឋានអត្តសញ្ញាណកម្ម របស់ក្រសួងមហាផ្ទៃ លើកឡើងថា ដើម្បីជួយសម្រួលដល់ប្រជាពលរដ្ឋ ដែលកំពុងជួបប្រទះបញ្ហាខុសទិន្នន័យអត្តសញ្ញាណរបស់ខ្លួននៅក្នុងបញ្ជី និងសំបុត្រអត្រានុកូលដ្ឋាន ជាមួយឯកសារអត្តសញ្ញាណដទៃទៀត និងធ្វើឲ្យសាមីខ្លួន ជួបការលំបាកយ៉ាងខ្លាំងក្នុងការស្នើសុំសេវារដ្ឋបាលផ្សេងៗ៕