មានរឿងអាថ​កំបាំងមួយចំនួនដែលមានអ្នកមិនទាន់បានដឹង ពី កំពូលតារាចម្រៀង ព្រាប សុវត្ថិ

មានអ្នកមួយចំនួនធំប្រាកដជាធ្លាប់ស្គាល់ និងគាំទ្រកំពូលតារាចម្រៀង លោក ព្រាប សុវត្ថិ ទាំងពេលកន្លងទៅ ក៏ដូចជាថ្មីៗនេះផងដែរ ដោយបានសរសើរពីទឹកចិត្ត និងភាពស្មោះត្រង់របស់លោកជាមួយភរិយាដោយមិនមានការប្រែប្រួលឡើយ ហើយក៏មិនដែលមានរឿងអាស្រូវស្នេហាអ្វីដែរចំពោះលោក។ បច្ចុប្បន្ននេះលោកមានកូនសុទ្ធតែប្រុសដល់ទៅបីនាក់ ហើយពេញកំលោះអស់ហើយ។

មិនត្រឹមតែប៉ុណ្ណោះទេ គេតែងតែសង្កេតឃើញថារាល់ពេលដែលលោកធ្វើដំណើរទៅណាក៏ដោយ ក៏មានមនុស្សជាច្រើនតែងតែចោមរោមលោក ព្រមទាំងសុំថតជាមួយ ហើយក៏មានមនុស្សមួយចំនួនបានកត់សំគាល់ឃើញថាលោកមិនដែលមានការធុញទ្រាន់ចំពោះអ្នកគាំទ្រណាម្នាក់ឡើយ ឲ្យតែមានមនុស្សមកសុំថត រឺក៏និយាយលេងជាមួយលោក លោកតែងតែនៅកំដររហូតបើទោះបីជាលោកមានការរវល់ការងារយ៉ាងណាក៏ដោយ។

ក្នុងនោះផងដែរមានរឿងអាថកំបាំងជាច្រើនទៀតដែលមានមនុស្សមួយចំនួនតូចមិនទាន់បានដឹង នោះគឺលោកចូលចិត្តស្តាប់បទពីដើមខ្លាំងណាស់ ដែលច្រៀងដោយ អធិរាជសម្លេងមាស លោក សីុន សីុសាមុត និង រាជនីសំនៀងមាស រស់ សេរីសុទ្ធា។ ហើយរឿងមួយវិញទៀត សត្វដែលលោកចូលចិត្តបំផុតនោះគឺសត្វឆ្កែ និងកីឡាដែលលោកពេញចិត្តនោះ គឺបាល់ទាត់ ហើយក៏នៅមិនទាន់អស់ទេគឺ លោក ព្រាប សុវត្ថិ ស្រលាញ់ ព័ណ៌ ស និងខ្មៅ។

លោកបានសិក្សា ផ្នែកសេដ្ឋកិច្ច និងច្បាប់ ហើយបានចាប់ផ្តើមចូលបំរើការនៅ ផលិតកម្មរស្មីហង្សមាស ចាប់តាំងពី ឆ្នាំ១៩៩៧។ មួយវិញទៀតលោក ព្រាប សុវត្ថិ គេធ្លាប់បានដាក់ឈ្មោះឲ្យគាត់ហៅក្រៅថា លោក សែន កំសត់ ព្រោះមានមនុស្សមួយចំនួនធ្លាប់ដឹងថាគាត់មានរឿងច្រើនគួរឲ្យអាណិត។

លោកក៏ធ្លាប់បានទទួលពានរង្វាន់កំពូលតារាចម្រៀងនៅកម្មវិធី អាណាចក្រតារា រៀបចំឡើងដោយ Sabay នៅទីក្រុងរណបកោះពេជ្រ នាថ្ងៃទី១៦ ខែកុម្ភៈ ឆ្នាំ២០១២ លោក ព្រាប​ សុវត្តិ គឺអាចចាត់ទុកជា កំពូលតារាចម្រៀងម្នាក់ដែលមានឈ្មោះបោះសម្លេងប្រចាំព្រះរាជាណាចក្រកម្ពុជា៕