ក្តៅៗ ប្លែកៗ!!! ពេលនេះអ្នកភ្នាល់ចាញ់បានរត់ចេញពីហាងកាហ្វេអស់ហើយទាក់ទងការរំលាយគណបក្សសង្គ្រោះជាតិ

ភ្នំពេញ ៖ ហាក់ដូចជាចម្លែកខ្លាំងណាស់ ដែលមហាជនបានដាក់ជាចម្ងល់ថា ហេតុអ្វីនៅតាមហាងកាហ្វេ និង គុយទាវ ដែលមានមនុស្សមកអង្គុយជជែកបែកផ្សេង តែមកស្ងប់ស្ងាត់នៅថ្ងៃទី១៧ ខែវិច្ឆិកា ឆ្នាំ២០១៧នេះទៅវិញ។

បងប្រុស ថេង ពិន ដែលជាអ្នករស់នៅក្នុងសង្កាត់និរោធ ខណ្ឌច្បារអំពៅ បាននិយាយថា មូលហេតុដែលនៅតាមតៀមកាហ្វេ និង ហាងគុយទាវ មានភាពស្ងប់ស្ងាត់នោះ ព្រោះតែរឿងអ្នកចាញ់ការភ្នាល់ថា គណបក្សសង្គ្រោះជាតិមិនត្រូវរំលាយនៅថ្ងៃទី១៦ ខែវិច្ឆិកា នេះ បានគេចខ្លួនមិនចូលខ្លួនសងថ្លៃប្រាក់សំណងដែលខ្លួនភ្នាល់ចាញ់។ បងប្រុសបន្តថា ចំពោះអ្នកភ្នាល់ឈ្នះមិនសុខចិត្ត គឺនាំគ្នាតាមទៅទារដល់ខ្នងផ្ទះអ្នកចាញ់តែម្តង។

ទាក់ទិនទៅនឹងអ្នកភ្នាល់ចាញ់នាំគ្នារត់មិនព្រមចេញសងនោះ ត្រូវបានអ្នកទទួលធ្វើជាអាជ្ញាកណ្ដាលបញ្ជាក់ថា អ្នកដែលភ្នាល់ចាញ់ភាគច្រើនជាសកម្មជនបក្សប្រឆាំង ហើយមិនសូវនិយាយទៀងទាត់នោះទេ ហើយម្យ៉ាងគេឆ្លើយថា ដាក់ភ្នាល់តែនឹងបបូរមាត់មិនមានលិខិតស្នាម។ ដូច្នេះអ្នកភ្នាល់ឈ្នះបានឈ្នះតែនឹងបបូរមាត់ ឯលុយភ្នាល់ឈ្នះគឺអត់។

គួរបញ្ជាក់ថា កាលពីមុនថ្ងៃទី១៦នេះ នៅតាមកាហ្វេ និង ហាងគុយទាវ គឺឮសូរតែសំឡេងដាក់ភ្នាល់ថា គណបក្សសង្គ្រោះជាតិ នឹងត្រូវរំលាយ ឬ មិនត្រូវរំលាយ តែចម្លែកណាស់នៅកន្លែងដែលធ្លាប់តែការដាក់ភ្នាល់ស្រាប់តែស្ងាត់ជ្រាបដូចចោរលួចសេះ៕