ឮសំឡេងជាសញ្ញារោទិ៍ឡើងចេញពីការដ្ឋាន ធ្វើឱ្យពួកគាត់ម្នាក់ៗភ័យស្លន់ស្លោរ តែនៅទីបំផុត...(មានវីដេអូ)

ខេត្តត្បូងឃ្មុំ ៖ បើតាមសេចក្តីរាយការណ៍បានឱ្យដឹងថា ស្ថិតក្នុងការដ្ឋានកិនថ្មមួយកន្លែងក្បែរភូមិដែលគេដឹងថា ជារបស់លោកឧកញ៉ា លីន ប៊ុណ្ណា ខណៈបំផ្ទុះយកថ្ម ស្រាប់តែវបំណែកថ្មបានខ្ទាតប៉ើងទៅលើអាកាសធ្លាក់មកវិញចំក្បាលស្ត្រីម្នាក់ស្លាប់ភ្លាមៗ បង្កឱ្យមានការភ្ញាក់ផ្អើលពេញភូមិ កាលពីវេលាម៉ោងប្រមាណជិត១២ថ្ងៃត្រង់ ថ្ងៃទី១ ធ្នូ នេះ ស្ថិតនៅក្នុងភូមិស្រែសៀម ឃុំជីរោទិ៍ទី២ ស្រុកត្បូងឃ្មុំ ខេត្តត្បូងឃ្មុំ ហើយកម្លាំងសមត្ថកិច្ច ព្រមទាំងអាជ្ញាធរមូលដ្ឋានក៏បានចុះមកពិនិត្យសពនៅកន្លែងកើតហេតុផងដែរ។

សេចក្តីរាយការណ៍បន្តថា ស្ត្រីរងគ្រោះខាងលើមានឈ្មោះ ខេង សំណាង អាយុ៣៣ឆ្នាំ មានប្តីឈ្មោះ មិន សុខ អាយុ៣៥ឆ្នាំ មានទីលំនៅស្នាក់នៅភូមិ-ឃុំខាងលើ។

បើតាមសម្តីរបស់ប្តីបានឱ្យដឹងថា នៅព្រឹកនេះមុនពេលកើតហេតុ គាត់បានចេញពីផ្ទះទៅស៊ីឈ្នួលច្រូតស្រូវឱ្យគេ ដើម្បីយកប្រាក់មកផ្គត់ផ្គង់ជីវភាពគ្រួសារ ។ ចំណែកប្រពន្ធរបស់គាត់ជាជនរងគ្រោះមិនបានទៅស្រែជាមួយគាត់ទេ ព្រោះប្រពន្ធរបស់គាត់នៅផ្ទះជាប់រវល់ចូលរួមភ្ជាប់ពិធីពាក្យអ្នកជិតខាង ។ លុះរហូតដល់វេលាម៉ោងជាង១១ព្រឹក ប្រពន្ធរបស់គាត់បានយកបាយទៅឱ្យគាត់នៅកន្លែងវាលស្រែច្រូតស្រូវ ក្នុងពេលនោះស្រាប់តែឮសំឡេងជាសញ្ញារោទិ៍ឡើងចេញពីការដ្ឋាន ធ្វើឱ្យពួកគាត់ម្នាក់ៗភ័យស្លន់ស្លោរ ក៏បាននាំគ្នារត់ចេញទៅឱ្យឆ្ងាយពីទីនោះប្រហែលជាង៧០០ម៉ែត្រ ប៉ុន្តែជាអកុសលបំណែកដែលបំផ្ទុះថ្មចេញពីការដ្ឋាននោះបានផ្លោងមកត្រូវចំក្បាលប្រពន្ធរបស់គាត់ បណ្តាលឱ្យស្លាប់ភ្លាមៗនៅកន្លែងកើតហេតុតែម្តង ។

ជុំវិញករណីខាងលើនេះ បុរសជាប្តីស្ត្រីរងគ្រោះបានសំណូមពរឱ្យលោកឧកញ៉ា លីន ប៊ុណ្ណា ម្ចាស់ការដ្ឋាន សូមជួយដោះស្រាយធ្វើយ៉ាងណាឱ្យកូនរបស់គាត់២នាក់បានរៀនចប់ចុងចប់ដើមផង ។ ទោះបីជាយ៉ាងណា មិនទាន់មានការឆ្លើយតបពីខាងលោកឧកញ៉ានៅឡើយទេ ប៉ុន្តែគាត់បានចូលបច្ច័យតាមរយៈមេឃុំចូលរួមបុណ្យសពស្ត្រីរងគ្រោះផងដែរ ៕