Update ពិតជាសាហាវមែន៖ កូនប្រុសមន្ត្រីពន្ធដាម្នាក់ស្រវឹង បើករថយន្តបុករះម៉ូតូ កង់ និងស្រ្តីពោះធំ ៨ខែម្នាក់ឲ្យរងរបួសធ្ងន់
បុរសម្នាក់ដែលគេស្គាល់ថា ជាកូនប្រុសរបស់មន្ត្រីពន្ធដាដ៏មានឥទ្ធិពលម្នាក់ផងនោះ បានត្រូវប្រជាពលរដ្ឋខឹងសម្បារយ៉ាងខ្លាំង ខណៈដែលបើករថយន្តម៉ាក LAND CRUISER PRADO ១គ្រឿង បុករះស្ត្រីមានផ្ទៃពោះម្នាក់ បណ្តាលឲ្យរងរបួសយ៉ាងធ្ងន់ធ្ងរ ហើយថែមទាំងបន្តបុករះម៉ូតូចំនួន ២គ្រឿងថែមទៀត បណ្ដាលឲ្យរងការខូចខាតយ៉ាងដំណំ ដែលបុរសខាងលើបើកបររថយន្តក្នុងស្ថានភាពសង្ស័យស្រវឹងស្រា កាលពីវេលាម៉ោង ៥ និង ៥០នាទី ល្ងាចថ្ងៃទី២៤ ខែធ្នូ ឆ្នាំ២០១៧ នៅតាមបណ្តោយផ្លូវលេខ៤៨៨ កែងនិងផ្លូវលំ ត្រង់ចំណុចភូមិបឹងត្របែក ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
តាមប្រភពព័ត៌មានពីកន្លែងកើតហេតុ បានប្រាប់ឲ្យដឹងថា មុនពេលកើតហេតុ គេបានឃើញបុរសម្នាក់បើករថយន្តម៉ាក LAND CRUISER PRADO ១គ្រឿង ពណ៌ខ្មៅ ពាក់ស្លាកលេខ ភ្នំពេញ ២T-៩៦៧៨ ធ្វើដំណើរក្នុងល្បឿនយ៉ាងលឿន លុះមកដល់ចំណុចកើតហេតុ ក៏បានឈប់រថយន្តមួយកន្លែង ដោយសារតែផ្លូវទាល់ទៅមិនរួច ខណៈនោះ បុរសជាអ្នកបើកបរបានបើករថយន្តថយក្រោយ ទៅបុកស្ត្រីពោះធំជិតគ្រប់ខែម្នាក់ បណ្តាលឲ្យរងរបួសយ៉ាងធ្ងន់ធ្ងរ និងបន្តទៅបុករះម៉ូតូ និងកង់ចំនួន ៣គ្រឿងទៀត បណ្តាលឲ្យរងការខូចខាតយ៉ាងដំណំផងដែរ។
ភ្លាមនោះ បុរសដែលបើករថយន្តបង្កបានព្យាយាមបើករត់គេច ក៏ត្រូវប្រជាពលរដ្ឋយកដុំថ្មកល់ពីមុខ និងក្រោយកង់រថយន្ត និងខឹងសម្បារយ៉ាងខ្លាំង ក៏បាននាំគ្នាឡោមព័ទ្ធយកដុំថ្មគប់កម្ទេចរថយន្តម៉ាក LAND CRUISER PRADO ១គ្រឿងនោះ ខូចខាតយ៉ាងដំណំផងដែរ តែបុរសជាអ្នកបើកបរនៅតែអង្គុយក្នុងរថយន្តរហូតទាល់តែសមត្ថកិច្ចមកដល់ ទើបបើករថយន្ដរត់គេចខ្លួនបាត់ស្រមោល។
ដោយឡែក ម៉ូតូដែលរងការខូចខាតនោះ គឺទី១-ម៉ូតូម៉ាកស្គូពី ១គ្រឿង ពណ៌ស ពាក់ស្លាកលេខ តាកែវ ១I-៩១៤២ និងទី២-ម៉ាក ZOOMER-X ពណ៌ទឹកសមុទ្រ ពាក់ស្លាកលេខ ភ្នំពេញ ១FW-៩៤០៤ មួយគ្រឿង និងកង់ចំនួន ១គ្រឿង ព្រមទាំងបាក់របងផ្ទះរបស់ប្រជាពលរដ្ឋអស់ចំនួន ១ផ្ទាំង ផងដែរ។
ក្រោយពេលកើតហេតុ ស្ត្រីមានផ្ទៃពោះ៨ខែរងគ្រោះ ត្រូវបានក្រុមគ្រួសារបញ្ជូនយកទៅធ្វើការសង្គ្រោះ នៅមន្ទីរពេទ្យ ហើយកម្លាំងមានសម្ថកិច្ចមូលដ្ឋាន រួមទាំងឪពុករបស់បុរសជាអ្នកបើករថយន្តដែលគេបាន ដឹងថា ជាមន្ត្រីពន្ធដាដ៏មានឥទ្ធិពលម្នាក់ បានចុះមកដល់កន្លែងកើតហេតុ និងធ្វើការរំដោះរូបកូនយកចេញទៅបាត់ស្រមោល ។ ដោយទុកតែរថយន្តបង្ក និងកូនចៅ រួមទាំងកម្លាំងមានសមត្ថកិច្ចមូលដ្ឋាន នាំគ្នាធ្វើការព្យាយាមដោះស្រាយ ដោយស្ងាត់ៗជាមួយនឹង ក្រុមគ្រួសាររបស់ស្ត្រីរងគ្រោះ ម្ចាស់ម៉ូតូទាំង២គ្រឿង និងកង់ចំនួន១គ្រឿង រួមទាំង ម្ចាស់ផ្ទះដែលបាក់របងមួយផ្ទាំងប៉ុណ្ណោះ ៕
Post a Comment