មកទៀតហើយ!!! នំដែលមានរូបរាងដូចលិង្គបុរស ពេលនេះពេញនិយមខ្លាំងនៅប្រទេសជិតៗយើងនេះ (មានវីដេអូស្រីៗញុាំឲ្យមើល)

នាពេលថ្មីៗនេះ នំដែលមានរូបរាងដូចលិង្គ កំពុងតែលក់ដាច់ និងពេញនិយមខ្លាំងនៅក្នុងប្រទេសថៃ។ ចំពោះអាជីវកម្មលក់នំពុម្ពរបស់អ្នកស្រី Ketnita Prasertsomboon ក៏មានភាពរលូន និងកំពុងទទួលបានការចាប់អារម្មណ៍យ៉ាងខ្លាំង មិនថាប្រុស ឬស្រីនោះទេ។

អ្នកស្រី Ketnita បានលក់នំពុម្ពនេះ នៅក្នុងហាងរបស់អ្នកស្រី ឈ្មោះ Pho Hai Ma ឬមានន័យជាភាសាអង់គ្លេសថា I Got It From My Dad នៅក្នុងផ្សាររាត្រី Indy Market ភាគខាងលិច ទីក្រុងបាងកក។ វាមានតម្លៃ ១,២០ ដុល្លារ ដោយអតិថិជនអាចញ៉ាំជាមួយនឹងទឹកជ្រលក់ ដូចជា ទឹកប៉េងប៉ោះ និង សូកូឡា ផងដែរ។

ទោះបីជាយ៉ាងណា មិនមែនមនុស្សគ្រប់គ្នាសុទ្ធតែចូលចិត្ត នំពុម្ពដែលមានរូបរាងដូចលិង្គ ដោតឈើចង្កាក់នោះឡើយ។ អ្នកស្រី Ketnita បាននិយាយថា «មនុស្សមួយចំនួនបានប្រាប់ខ្ញុំថា ខ្ញុំកំពុងធ្វើរឿងដែលគួរឲ្យអៀនខ្មាស និងប្រាស់ចាកពីព្រះពុទ្ធសាសនា។ ខ្ញុំមានភាពតានតឹងបន្តិចបន្តួចដែរ ប៉ុន្តែខ្ញុំមិនតតាំងវិញទេ។ ខ្ញុំគ្រាន់តែចង់ឲ្យពួកគេ មើលឃើញវាជានំប៉ុណ្ណោះ»។

ថៅកែហាងនំពុម្ពរូបរាងចម្លែកខុសគេខាងលើ ទទួលបានអតិថិជនកាន់តែច្រើន បន្ទាប់ពីអតិថិជនរបស់នាង បានបង្ហោះវីដេអូញ៉ាំនំពុម្ពនោះ នៅលើបណ្ដាញសង្គមហ្វេសប៊ុក កាលពីថ្ងៃទី១៦ ខែកញ្ញា ហើយទទួលបានចំនួនអ្នកចូលមើល រហូតដល់ទៅ ១៩ លានដងឯណោះ។

ផ្ទុយទៅវិញ តារាស្រីថៃម្នាក់មានឈ្មោះថា Yingsak Chonglertjetsadawong បានបញ្ចេញប្រតិកម្មថា «ខ្ញុំមិនដែលគិតថា ខ្ញុំនឹងជួបប្រទះអាហារដែលមានរូបរាងដូចប្រដាប់បន្តពូជ បែបនេះទេ។ តើអ្នកនឹងទិញវាឲ្យឪពុកម្ដាយរបស់អ្នកទេ? តើអ្នកអាចដាក់វាធ្វើជាចង្ហាន់លោកសង្ឃទេ? ប្រសិនបើក្មេងស្រីអាយុ ៧ ឬ ៨ ឆ្នាំញ៉ាំវានៅតាមផ្លូវ តើវាជាអ្វីដែលអ្នកចង់ឃើញឬទេ?»។

Yingsak បានបន្ថែមទៀតថា «មនុស្សស្រីមួយចំនួន បានថតរូបពួកគេញ៉ាំវា ឬខ្លះថតវីដេអូ បង្ហោះលើអ៊ីនធឺណិតទៀតផង។ វាមិនសមរម្យឡើយ និងជាគំរូអាក្រក់សម្រាប់យុវវ័យ»។ យ៉ាងណាមិញ Yingsak ក្រោយមកក៏បានជំរុញឲ្យអ្នកដទៃឈប់ទិញ និងញ៉ាំនំពុម្ពនោះទៀតផង។

គួររំលឹកឡើងវិញផងដែរថា កាលពីពេលកន្លងទៅនេះ តាមរយៈអ្នកស្រីហ្គេតនីតា ប្រាស៊ើតស៊ុមប៊ូន ដែលជាម្ចាស់ហាងនំមួយ នៅផ្សារ «Indy» ប្រទេសថៃបានប្រាប់ឲ្យដឹងថា កាលពីមុនគាត់គឺជាបុគ្គលិករបស់ក្រុមហ៊ុន ហើយប្រាថ្នាចង់មានអាជីពផ្ទាល់ខ្លួន ។ ក្រោយមកគាត់ឃើញរូបភាពនំ«Waffle»មានរូបរាងដូចលិង្គតាមអីុនធើរណេតដាក់លក់នៅបរទេសក៏ចាប់អារម្មណ៍ចង់លក់ដែរ ។ គាត់បានទិញពុម្ព និងរូបមន្តនៃការផលិតនំនោះដើម្បីផលិតលក់ ។

នៅពេលដាក់លក់ដំបូងក្នុងខែសីហា ២០១៧ មិនបានផលល្អទេ ព្រោះអតិថិជនមិនហ៊ានទិញទទួលទាន ព្រោះខ្មាសអៀន ប៉ុន្តែក្រោយមកលក់ដាច់ដោយមានអតិថិជនច្រើនទិញ ព្រោះចង់ភ្លក្សរសជាតិ និងម្យ៉ាងវាមានរូបរាងប្លែកផង ។ នំ«Waffle»មួយមានតម្លៃ៣៩បាត និងលក់បានជាង១០០នំជារៀងរាល់ថ្ងៃ ។

អ្នកស្រីហ្គេតនីតា និយាយថា គាត់សម្រេចចិត្តបើកហាងលក់ផ្ទាល់ខ្លួន ព្រោះមិនចង់ធ្វើការឱ្យក្រុមហ៊ុន ។ ជាលើកដំបូងលក់បានចំណូលតិច ប៉ុន្តែក្រោយមករកចំណូលបានច្រើន ។ សម្រាប់ប្រាក់ចំណូលក្នុងរយៈពេល១ខែកន្លងមកចំនួន៤០.០០០បាត ច្រើនជាងចំណូលធ្វើការនៅក្រុមហ៊ុន ។

នាងរ៉ាវីវណ្ណ ឆាតរ៉ាសា ជាអតិថិជនមួយរូបនិយាយថា «នៅពេលឃើញ«Waffle»ដែលមិត្តភក្តិផ្ញើឱ្យ ខ្ញុំទទួលស្គាល់ថា ជារូបភាពថ្មីទាក់ទាញអតិថិជនមានចំណាប់អារម្មណ៍ខ្ពស់ជាទីគាប់ចិត្ត»៕