តើមាននរណាចង់សាកវិធីសាស្ត្រដេញរុយដ៏មានប្រសិទ្ធភាពខ្ពស់តាម កញ្ញា រ៉ូហ្ស៊េតទេ?

កញ្ញា ស៊ីន ចាន់ពៅរ៉ូហ្ស៊េត ធ្លាប់ជាចៅសង្កាត់​អូរចារ ក្រុង​បាត់ដំបង ហើយនាពេលថ្មីៗកញ្ញាក៏បានបើកអាហារដ្ឋានផ្ទាល់ខ្លួនផងដែរ ដោយមានការគាំទ្រជាច្រើន ព្រោះអាហារដ្ឋានមួយនេះមានម្ហូបឆ្ងាញ់ដែលសុទ្ធសឹងជារបស់ខ្មែរយើង មួយវិញទៀតដោយសារការអាណិតស្រឡាញ់ពីបងប្អូនមួយចំនួនផងដែរ។

ក្នុងនោះផងដែរអ្វីដែលជាក្តីបារម្មណ៍របស់អ្នកលក់ដូរទូទៅ ជាពិសេសអ្នកលក់របស់ញុាំនោះ គឺមិនចង់ឃើញសត្វរុយឡើយ ព្រោះវាមិនត្រឹមតែរំខានទេ វាបានផ្តល់ផលប៉ះពាល់មួយចំនួន ប្រសិនបើវាបានទំលើម្ហូបទាំងនោះ ដោយអាចបណ្តាលឲ្យចុកពោះក៏ថាបាន នេះក៏ព្រោះតែសត្វនេះមិនដឹងទៅទំលើរបស់អ្វីខ្លះទេ។

ជាក់ស្តែងកាលពីម្សិលមិញនេះ នាថ្ងៃទី១៦ ខែមករា ឆ្នាំ២០១៨ កញ្ញា រ៉ូហ្ស៊េតបានបង្ហោះសារដ៏រីករាយបំផុតមួយ ព្រោះកញ្ញាបានរកឃើញពីវិធីដេញរុយដ៏មានប្រសិទ្ធភាព ដោយក្នុងនោះគាត់បានសរសេរក្នុងហ្វេសប៊ុករបស់ខ្លួនថា៖ 

"រាត្រីសួស្តី !

🌷🌷🌷🌷
ថ្ងៃនេះខ្ញុំរីករាយណាស់ ព្រោះខ្ញុំបានរកឃើញវីធីបន្លាចរុយបានសម្រេចនៅក្នុងហាងរបស់នាងខ្ញុំ
ដោយធ្វើអោយវាខ្លាចស្រមោលខ្លួនឯង (ច្រកទឹកក្នុងថង់ផ្លាស្ទីចពណ៌ស ចងកៅស៊ូអោយជាប់ ហើយដាក់ចុងតុ ដើមតុ ពេលរុយហើរមក វាឃើញស្រមោលវានៅក្នុងថង់រីកធំជាងខ្លួនវា ធ្វើអោយវាភ័យខ្លាចលេងហើរមកក្បែរ)៕"

ដូចនេះប្រសិនបើបងប្អូនណាជួបបញ្ហាដូចគាត់អាចធ្វើការសាកល្បងបាន ព្រោះមើលទៅងាយស្រួលធ្វើ ហើយចំណាយលុយអស់តិចតួចបំផុតថែមទៀតផង៕