មាននរណាចង់សាកអត់!!! ទីបំផុត ឡូរី មានផ្លូវផ្ទាល់ខ្លួនហើយ សម្រាប់ជិះលេងកម្សាន្ត

ឡូរី ដែលគេស្គាល់ថាជាគ្រែឫស្សីដើរដោយម៉ាស៊ីនសម្រាប់ដឹកភ្ញៀវទេសចរ ត្រូវបានអភិវឌ្ឍឡើងវិញនៅជាប់ជើងភ្នំបាណន់ ស្ថិតក្នុងស្រុកបាណន់ ខេត្តបាត់ដំបង និងបានបើកសម្ពោធដាក់ឲ្យដំណើរការជាផ្លូវការ ជាលើកដំបូងគេបង្អស់នៅក្នុងប្រទេសកម្ពុជា ក្រោមកិច្ចសហការសាងសង់ឡើងរវាងអាជ្ញាធរខេត្ត និងក្រុមហ៊ុនដៃគូអភិវឌ្ឍន៍។

លោក សយ បូរ៉ា ស្ថាបនិកនៃស្ថានីយឡូរី បានប្រាប់ឲ្យដឹងថា ការសាងសង់ផ្លូវ និងឡូរីទេសចរណ៍នេះ ក្នុងគោលបំណងឲ្យភ្ញៀវទេសចរ ជិះឡូរីលេងកម្សាន្ត និងទស្សនាតំបន់ទេសចរណ៍សម្បត្តិវប្បធម៌ សម្បត្តិធម្មជាតិ និងមើលតំបន់កសិទេសចរណ៍នៅជុំវិញភ្នំបាណន់។

លោក បូរ៉ា ឲ្យដឹងថា ការសាងសង់ចែកជាច្រើនដំណាក់កាល ដោយដំណាក់កាលដំបូងគឺសាងសង់ផ្លូវឡូរីនេះមានប្រវែងជាង ៣គីឡូម៉ែត្រ និងមានឡូរីសរុបប្រមាណជាង ៣០។ បន្ទាប់មកគឺសាងសង់ស្ថានីយសម្រាប់ភ្ញៀវរង់ចាំ តំបន់សិក្សាប្រវត្តិសាស្ត្រ រមណីយដ្ឋានទេសចរណ៍ជាដើម។ លោកសូមមិនបញ្ជាក់ពីទុនវិនិយោគនោះឡើយ។

លោកបន្តថា “តម្លៃនៃការជិះឡូរីនេះ គឺភ្ញៀវខ្មែរ តម្លៃ ១ម៉ឺនរៀល សម្រាប់ភ្ញៀវអន្តរជាតិតម្លៃ ២ម៉ឺនរៀល ភ្ជាប់ជាមួយការធានាអាយុជីវិត។ ដោយឡែកសម្រាប់ការធ្វើដំណើរតាមផ្លូវឡូរីមានរយៈពេលប្រហែល កន្លះម៉ោង។លោក បញ្ជាក់ថា ឡូរីទេសចរណ៍សម័យថ្មីនេះ នឹងធ្វើឲ្យភ្ញៀវទេសចរទទួលបាននូវបទពិសោធថ្មីមិនធ្លាប់មានពីមុនមក។

លើសពីនេះ បើតាមលោក អ៊ុច អ៊ុភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានអះអាង ក្នុងថ្ងៃសម្ពោធផ្លូវឡូរីកាលពីថ្ងៃទី ៣១ ធ្នូ ២០១៧ បន្ថែមថា ការសាងសង់ផ្លូវឡូរីថ្មីនេះ នឹងសង់ឲ្យដល់ភ្នំសំពៅ ដែលគិតជារយៈចម្ងាយ ប្រមាណជាង ១៦គីឡូម៉ែត្រ៕