ប្លែកទៀតហើយ!!! រថយន្ត Lexus ចុងក្រោយនេះអត់មានកញ្ចក់ក្រោយនៅខាងក្រៅទៀតទេ (មានវីដេអូ ឡូយកប់ម៉ង)

ក្រុមហ៊ុន Lexus បានបង្ហាញចេញរថយន្ត Lexus LF-1 ជាប្រភេទ Concept នៅក្នុងកម្មវិធីតាំងបង្ហាញរថយន្ត។ ដោយក្រុមហ៊ុនមិនបានបញ្ជាក់ឲ្យបានច្បាស់លាស់ច្រើនទេ ចំពោះរថយន្តនេះ ដោយបាននិយាយយ៉ាងសាមញ្ញថា ៖ “ដូចជាឈ្មោះរបស់វាអ៊ីចឹង ភាពដែលអាចទៅរួចនៃប្រព័ន្ធម៉ាស៊ីនរបស់វាគឺគ្មានដែនកំណត់”។ នេះមានន័យថាប្រភេទម៉ាស៊ីនរបស់រថយន្តនេះ អាចជាប្រើ Fuel Cell, Plug-in Hybrid, ប្រើប្រេងឥន្ធនៈ ឬ ប្រើអាគុយ។

ការប្រកាសចេញគំរូរថយន្តថ្មីមួយនេះគឺមានពណ៌មាសក្រហម (Rose Gold) ដែលប្លែកដំបូងគេក្នុងលោកហើយថែមទាំងលែងប្រើកញ្ចក់មើលក្រោយ ដាក់ខាងក្រៅដូចឡានទូទៅទៀតហើយ ដោយកញ្ចក់នោះដាក់ខាងក្នុងវិញម្តង។

នៅត្រង់ចង្កូត Lexus LF-1 Limitless បំពាក់ដោយផ្ទាំងអេក្រង់រាងត្រីកោណ ហើយថែមទាំងអាចឲ្យអ្នកបើកបរបញ្ជាមុខងារជាច្រើនយ៉ាងងាយស្រួលដូចជា ប្រព័ន្ធដំណើរការលើទូរសព្ទ មីនុយ និងមុខងារជំនួយឲ្យបើកបរលើគន្លងផ្លូវ ឯមុខងារជាច្រើនផ្សេងទៀតជាលក្ខណៈ Touchscreen បំពាក់នៅខាងលើផ្នែកខាងស្តាំពីលើក្បាលអ្នកបើកបរ។ នៅខាងស្តាំក្បែរអ្នកបើកបរមានផ្ទុកមុខងារជាច្រើន សម្រាប់គ្រប់គ្រងការបើកបរ ដែលអាចចុចលក្ខណៈ Touchscreen បានងាយបំផុត។

ចំពោះកញ្ចក់មើលក្រោយដែលធម្មតាស្ថិតនៅខាងក្រៅឡានទាំងសងខាង ត្រូវផ្លាស់ប្តូរមកបំពាក់នៅខាងក្នុងឡានសងខាងចង្កូតអ្នកបើកបរ ជាលក្ខណៈកញ្ចក់អេឡិចត្រូនិក។ រូបរាងខាងមុខនិងខាងក្រៅស្រដៀងគ្នាទៅនឹងត្រកូល Lexus 400NX តែអ្វីដែលអស្ចារ្យសម្រាប់ Lexus LF-1 Limitless គឺការរចនាផ្នែកខាងក្នុងតែម្តង។

អ្នកដំណើរខាងក្រោយ នៅត្រង់កៅអីទាំងពីរអាចប្រើផ្ទាំង Touchscreen ម្នាក់មួយដោយសេរី ដែលវាមានមុខងារអាចឲ្យពួកគេបញ្ជាទៅលើភ្លើងឡានខាងក្នុង កែសម្រួលកៅអីអង្គុយនិងមួយចំនួនផ្សេងទៀត ដោយមិនបាច់ពឹងអ្នកបើកបរ។