ល្បីទៀតបាត់!!! ធ្លាប់ឃើញឡានមានពោងសុវត្ថិភាព ពេលនេះ ម៉ូតូ PCX ក៏មានដែរ (មានវីដេអូ)

នៅឆ្នាំ ២០១៧ នេះក្រុមហ៊ុនហុងដាបានបញ្ចេញសមិទ្ធផលថ្មីៗ រួមទាំងបច្ចេកវិទ្យាថ្មីៗជាច្រើនទាក់ទងនឹងម៉ូតូ ជាពិសេសនៅលើម៉ូតូម៉ូដែល PCX ដែលបានទាក់ទាញចំណាប់អារម្មណ៍មនុស្សម្នាជាច្រើន។ មានម៉ូតូ PCX ៣ ប្រភេទដែលអតិថិជនចង់ឃើញមានលក់លើទីផ្សារឆាប់ៗ ក្នុងនោះរួមមាន ៖

១. PCX មានពោងសុវត្ថិភាព៖ កាលពីដើមខែសីហាកន្លងទៅក្រុមហ៊ុន PCX បានបង្ហាញពីការធ្វើតេស្ត ដាក់បន្ថែមពោងសុវត្ថិភាពលើម៉ូតូ PCX។ ពោងសុវត្ថិភាពដែល Honda ប្រើសម្រាប់ម៉ូតូអូតូរបស់ខ្លួនគឺផលិតដោយ Autoliv ដែលជាក្រុមហ៊ុនផ្គត់ផ្គង់ខាងប្រព័ន្ធសុវត្ថិភាពដ៏ល្បីឈ្មោះមួយ។ ពោងសុវត្ថិភាពនេះអាចការពារក្បាលរបស់អ្នកបើកបរ និង កាត់បន្ថយរបួសដែលអាចកើតមានពេលជួបគ្រោះថ្នាក់ប៉ះទង្គិចណាមួយ ជាពិសេសការប៉ះទង្គិចចំពីមុខ។

ប្រព័ន្ធពោងសុវត្ថិភាពសម្រាប់ម៉ូតូនេះដំណើរការដូចប្រព័ន្ធពោងសុវត្ថិភាពលើរថយន្តរបស់ Honda យ៉ាងអ៊ីចឹង។ នៅជាប់ហ្វ្រាំងខាងមុខមាន Sensor ដែលមានសមត្ថភាពអាចស្ទង់ដឹងពីការប៉ះទង្គិចអាចកើតមានឡើង។ បន្ទាប់ពី Sensor ចាប់បានហើយប្រព័ន្ធនឹងបញ្ចេញពោងសុវត្ថិភាពសុវត្ថិភាពក្នុងពេល ០,០៤ ទៅ ០,០៥ វិនាទី។ ការធ្វើតេស្តបង្ហាញថានៅពេលប៉ះទង្គិចក្នុងល្បឿន ៥០ គ.ម/ម៉ ពោងសុវត្ថិភាពជួយកាត់បន្ថយរបួសដែលអាចកើតមានបានមួយកម្រិត។

២. PCX Electric (PCX ប្រើអាគុយ)៖ ម៉ូដែល PCX ប្រើអាគុយបានបង្ហាញខ្លួនក្នុងកម្មវិធី Toyko Motor Show នាខែតុលា ដោយវាមានបំពាក់នូវម៉ូទ័រអគ្គិសនីកម្លាំងខ្លាំង ផលិតឡើងដោយក្រុមហ៊ុន Honda ផ្ទាល់ ដោយវាអាចផលិតកម្លាំងបាន ០,៩៨ គីឡូវ៉ាត់។ Honda មិនបានបង្ហាញព័ត៌មានអ្វីច្រើនឡើយក្រៅពីបង្ហាញរូបរាងម៉ូតូនេះ ប៉ុន្តែគេដឹងថានៅក្នុងឃ្លុបម៉ូតូមានបំពាក់អាគុយចំនួនពីរសម្រាប់ដំណើរការម៉ូទ័រអគ្គិសនី។

៣. PCX Hybrid
PCX Hybrid ក៏បង្ហាញខ្លួនក្នុងកម្មវិធី Tokyo Motor Show ដែរ ដោយមានបំពាក់នូវប្រព័ន្ធម៉ាស៊ីន Hybrid ដែលផលិតឡើងជាពិសេសសម្រាប់ម៉ូតូ។ ប្រព័ន្ធ Hybrid ដ៏តូចនេះ មាននូវអាគុយមួយ រួមជាមួយនឹងប្រព័ន្ធបញ្ឆេះ ACG សម្រាប់ជំនួយដល់ម៉ាស៊ីន និងដំណើរការម៉ូតូ។

PCX Hybrid មានការរចនារូបរាងដូចនឹង PCX ធម្មតាដែរ ដោយមានបំពាក់នូវសោតេឡេ, កុងទ័រឌីជីថល, ភ្លើងមុខក្រោយជាប្រភេទ LED។ ទាំង PCX Electric និង PCX Hybrid កំណត់ថានឹងបញ្ចេញលក់លើទីផ្សារប្រទេសជប៉ុន និងប្រទេសក្នុងទ្វីបអាស៊ីដទៃទៀត នៅឆ្នាំ ២០១៨៕

គួរបញ្ជាក់ឡើងវិញផងដែរថា ម៉ូតូ Honda PCX ឆ្នាំ ២០១៨ ដែលទើបចេញលក់ផ្លូវការនៅប្រទេសថៃកាលពីថ្ងៃទី២១ ខែធ្នូ ឆ្នាំ២០១៧ កន្លងទៅនេះ បានមកដល់ទីផ្សារប្រទេសកម្ពុជាបណ្ដើរៗហើយ។ មក&ដល់ខ្មែរដំបូងម៉ូតូមានម៉ាស៊ីនចំណុះ ១៥០ សេសេ លក់បានក្នុងតម្លៃមួយខ្ពស់បំផុត បើធៀបនឹង PCX ឆ្នាំ ២០១៧។

ចំពោះលក្ខណៈសម្បត្តិ និងចំណុចពិសេសរបស់ PCX ឆ្នាំ២០១៨នេះ គឺវាមានរូបរាងខុសប្លែកពីស៊េរីមុន ជាពិសេសត្រង់រចនាបថភ្លើងខាងមុខ និងភ្លើងខាងក្រោយ ដែលប្រើប្រភេទអំពូល LED។ សោ Smart Key ក៏មានរចនាបថថ្មីស្អាត& និងតូចស្រួលកាន់ជាងមុន។ សោនេះទៀតសោត អាចបញ្ជាឲ្យម៉ូតូបើកភ្លើងស្វាគមន៍ (Welcome Light) ដើម្បីងាយស្រួលរកម៉ូតូទៀតផង។

រីឯកុងទ័រម៉ូតូបានផ្លាស់ប្ដូរមកជាប្រភេទឌីជីថលសុទ្ធ មិនមានលាយជាមួយនឹងកុងទ័រធម្មតាដូចមុនទៀតឡើយ។ ឃ្លុបក្រោមកែបម៉ូតូមានទំហំទូលាយ អាចផ្ទុកឥវ៉ាន់បានច្រើន ហើយកែបអង្គុយមានជាគន្លាក់អាចអង្គុយស៊ប់ បើកបរបានកាន់តែល្អ។ បច្ចេកវិទ្យាឆ្លាតវៃ Honda Smart Technology ក៏នៅតែមានប្រើលើ PCX 150& ស៊េរីថ្មី មានដូចជាប្រព័ន្ធម៉ាស៊ីន eSP, ហ្វ្រាំង Combi Brake (ចាប់មួយស៊ីទាំងពីរ) និងមុខងារ Idling Stop ដែលអាចពន្លត់ម៉ាស៊ីនដោយស្វ័យប្រវត្តិ។

ក្នុងនោះផងដែរបើតាមការលើកឡើងរបស់ម្ចាស់ហាងលក់ម៉ូតូមួយនៅក្នុងទីក្រុងភ្នំពេញនេះបានឲ្យដឹងថា ម៉ូតូ PCX ឆ្នាំ ២០១៨& លក់បានក្នុងតម្លៃដល់ខ្ទង់ ៤០០០ ដុល្លារឯណោះ ស្របពេលដែល PCX ស៊េរីឆ្នាំ ២០១៧ មានតម្លៃប្រមាណ ៣៥០០ ដុល្លារ តែប៉ុណ្ណោះ។ លក់បានក្នុងតម្លៃខ្ពស់បែបនេះ ក៏ប្រហែលមកពី PCX ស៊េរីថ្មី មានបន្ថែមចំណុចពិសេសមួយចំនួន រួមទាំងផ្លាស់ប្ដូររូបរាងបន្តិចបន្តួចផងដែរ។