ឪពុកម្តាយគ្រប់រូបគួរប្រុងប្រយ័ត្ន ដើម្បីជៀសវាងជួបរឿងស៊យដូចក្មេងស្លាប់ម្នាក់នេះ

ព្រៃវែង ៖ ក្មេងប្រុសអាយុបួនឆ្នាំម្នាក់ ត្រូវបានចរន្តភ្លើងឆក់ស្លាប់ភ្លាមៗ បន្ទាប់ពីជីដូនទុកព្រីភ្លើងចោល ហើយត្រូវក្មេងប្រុសនោះលូកចង្អុលដៃចូលបណ្តាលឱ្យឆក់។ ហេតុការណ៍ក្មេងប្រុសត្រូវអគ្គិសនីឆក់ស្លាប់ខាងលើ បានបង្កការភ្ញាក់ផ្អើលកាលពីថ្ងៃទី១៩ ខែកុម្ភៈ ឆ្នាំ២០១៨ វេលាម៉ោង ១៧ និង ៤៥ នាទី នៅក្នុងភូមិព្រែកចំប៉ា ឃុំមេសប្រចាន់ ស្រុកពារាំង ខេត្តព្រៃវែង។

សមត្ថកិច្ចបានឱ្យដឹងថា ក្មេងប្រុសរងគ្រោះខាងលើមានឈ្មោះ ហី ហ័ន ភេទប្រុស អាយុ៤ឆ្នាំ រស់នៅជាមួយជីដូនក្នុងភូមិឃុំកើតហេតុខាងលើ។ នៅមុនពេលកើតហេតុ គឺជីដូនជនរងគ្រោះបានដាក់ព្រីភ្លើងចោល បន្ទាប់មកចៅប្រុសរងគ្រោះបានយកឌុយទៅដោត ក៏ចូលម្រាមដៃចង្អុលទៅក្នុងព្រីភ្លើងដែលមានចរន្តបណ្តាលឱ្យឆក់ស្លាប់ភ្លាមៗតែម្តង។

សមត្ថកិច្ចបានបញ្ជាក់ថា ឪពុកម្តាយក្មេងរងគ្រោះមិននៅជាមួយជនរងគ្រោះឡើយ គឺពួកគាត់បានចេញទៅរកស៊ីនៅឯខេត្តប៉ៃលិនឯណោះ។ ទាំងនេះគឺជាការធ្វេសប្រហែសរបស់អាណាព្យាបាល ដូចនេះសូមបងប្អូនប្រជាពលរដ្ឋមេត្តាប្រុងប្រយ័ត្នឱ្យមែនទែន កុំទុកព្រីភ្លើងដែលមានចរន្តភ្លើងឱ្យនៅរញ៉េរញ៉ៃ ដែលក្មេងអាចលូកដល់ឱ្យសោះ ដើម្បីជៀសវាងកុំឱ្យមានដូចករណីខាងលើ៕