ស្ងាត់ៗឡាន Mercedes មកដល់ខ្មែរបាត់ តែបើនិយាយពីតម្លៃវិញដល់កម៉ង

វត្តមានរថយន្ត Mercedes-Maybach Pullman ដែលមានតម្លៃជាង ៦០ ម៉ឺនដុល្លារ (តម្លៃបរទេស) មិនទាន់ធ្វើឲ្យបាត់កក្រើកប្រទេសកម្ពុជាផង ស្រាប់តែពេលនេះរថយន្ត Mercedes ស៊េរីកប់មួយគ្រឿងទៀត ត្រៀមនឹងបង្ហាញខ្លួននៅកម្ពុជានាថ្ងៃនេះផ្ទាល់។

តាមការបង្ហាញរបស់ហាងលក់រថយន្ត គីមស្រ៊ុន ព្រីមៀមអូតូ ដែលតែងនាំចូលរថយន្តស៊េរីកប់ៗ បានឲ្យដឹងរថយន្ត Merces-Maybach S650 ដែលនាំចូលពីប្រទេសអាល្លឺម៉ង់នឹងលេចវត្តមាននៅកម្ពុជានាថ្ងៃសៅរ៍ទី១៧ ខែកុម្ភៈ ឆ្នាំ២០១៨ នេះបើតាមការអះអាងពី គឹមស្រ៊ុនព្រីមៀមអូតូ (Kimsrun Premium Auto)។

រថយន្តត្រកូល Maybach មួយនេះជាប្រភេទរថយន្តលីម៉ូស៊ីន (Limousine) ដែលជាគូប្រជែងដ៏ខ្លាំងក្លារបស់រថយន្ត Rolls-Royce Phantom និង Bentley Mulsanne ដែលសុទ្ធសឹងជារថយន្តអាចផ្ដល់ផាសុកភាពដល់អ្នកដំណើរក្នុងរថយន្តបានយ៉ាងល្អជាទីបំផុត។

Maybach S650 មានរូបរាងលេចធ្លោសក្ដិសមជាមួយនឹងអ្នកជំនួញ និងត្រកូលអភិជន។ រថយន្តនេះមានបំពាក់ដោយចង្កៀងប្រភេទ LED ទាំងចង្កៀងមុខ និងក្រោយ និងមានប្រើបច្ចេកវិទ្យា Stardust ដែលធន់បានយូរ និងសន្សំសំចៃថាមពលបានយ៉ាងល្អ។ បន្ថែមពីនេះផ្នែកខាងក្នុងរថយន្តក៏មានប្រើអំពូល LED ដើម្បីបង្កើនបរិយាកាសដ៏ល្អឥតខ្ចោះមួយក្នុងរថយន្តតាមរយៈភ្លើងពណ៌ជាច្រើនពណ៌។

ខាងក្នុងរថយន្តមានបំពាក់ដោយកៅអីស្រោបដោយស្បែកសត្វ ដែលដេរភ្ជាប់គ្នាដោយដៃមនុស្សសុទ្ធសាធ, ផ្នែកខាងក្នុងរថយន្តមានទំហំធំទូលាយ, មានបំពាក់ដោយអេក្រង់ទំហំ ១២,៣ អ៊ីញប្រើសម្រាប់បញ្ជាមុខងារ និងបង្ហាញព័ត៌មានផ្សេងៗ។ ដំបូលរបស់រថយន្តមានក្រាលដោយផ្ទាំងកញ្ចក់ថ្លា ទាំងនៅផ្នែកអ្នកបើកបរ និងអ្នកដំណើរ។

រថយន្ត Maybach S650 នេះមានបំពាក់ដោយម៉ាស៊ីនប្រភេទ Biturbo ស៊ីឡាំង ១២ ចំណុះ ៦,០ លីត្រ បង្កើនសន្ទុះពី ០ – ១០០ គ.ម/ម៉ ប្រើពេលតែ ៤,៦ វិនាទី។ បន្ថែមពីនេះវាមានប្រព័ន្ធសុវត្ថិភាពជាច្រើន ដើម្បីជំនួយដល់ការបើកបរ និងផ្ដល់សុវត្ថិភាពដល់អ្នកដំណើរបានយ៉ាងខ្ពស់បំផុត។

នៅទីផ្សារសហរដ្ឋអាមេរិក Maybach S650 មានតម្លៃ ១៩៨ ៧០០ ដុល្លារ ជាតម្លៃចេញពីរោងចក្រ។ តម្លៃនេះអាចឡើងដល់ខ្ទង់កន្លះលានដុល្លារពេលមកដល់ប្រទេសកម្ពុជា បើគិតបន្ថែមតម្លៃពន្ធនាំចូល និងតម្លៃដឹកជញ្ជូនជាដើម៕