ពិតជាខ្លោចចិត្តណាស់!!! អ្នកដែលមានភ្នែកមើលឃើញ ពេលនេះស្លាប់ចោល ប្រពន្ធ និងកូន២នាក់ សុទ្ធតែពិការភ្នែក មើលឃើញព្រាលៗ (មានវីដេអូ)

ខេត្តកំពត៖ នៅថ្ងៃទី២០ ខែមីនា ឆ្នាំ២០១៨ វេលាម៉ោង ១០:០០ នាទី ក្រុមការងារស្នងការដ្ឋាននគរបាលខេត្ត បាននាំយកអំណោយជាមឈូស និងអង្ករចំនួន ០២ បាវ ស្មើនឹង ១០០ គីឡូក្រាម ដែលជាសទ្ធាដ៏ជ្រះថ្លារបស់លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត និងលោកស្រី ដើម្បីចូលរួមរំលែកមរណៈទុក្ខដ៏ក្រៀមក្រំនេះ ទៅប្រគល់ជូនក្រុមគ្រួសារសពឈ្មោះ សុខ វ៉ា ភេទប្រុស អាយុ ៣៥ ឆ្នាំ នៅភូមិច្រនៀងទេ ឃុំភ្នំប្រសាទ ស្រុកកំពង់ត្រាច ដែលទទួលមរណៈភាពកាលពីថ្ងៃទី១៩ ខែមីនា ឆ្នាំ២០១៨ វេលាម៉ោង ១៤:០០ នាទី ដោយលង់ទឹក។

គួររំលឹកផងដែរថា គ្រួសារក្រីក្រមួយនេះ មានសមាជិក៤នាក់ គឺប្ដី-ប្រពន្ធ និងកូនប្រុស-ស្រី ២នាក់។ កាលពីរសៀលថ្ងៃទី១៩ ខែមីនា ឆ្នាំ២០១៨ កន្លងទៅថ្មីៗនេះ បុរសជាប្ដីបាននាំកូនប្រុស-ស្រី ២នាក់ ដែលសុទ្ធតែពិការភ្នែកពីកំណើត ដោយគ្រាន់តែមើលឃើញព្រាលៗ ទៅអូសឈឹបរកត្រីយកមកលក់ គ្រាន់ដោះស្រាយជីវភាពក្នុងគ្រួសារ តែជាអកុសល ឪពុកម្នាក់នេះបានលង់ទឹកស្លាប់ នៅក្នុងស្រះទឹកមួយ នៅក្នុងភូមិបាត់ទៅហើយ។

ចំណែកឯប្រពន្ធ ឈ្មោះ ហែម ឃីម អាយុ៤០ឆ្នាំ ក៏ពិការភ្នែកមើលឃើញព្រាលៗដែរ ក៏បានរៀបរាប់បន្ថែមថា គ្រួសាគាត់់ក្រីក្រណាស់ សម្រាប់ជីវភាពប្រចាំថ្ងៃមានតែការរកត្រី និងខ្យងក្ដាមលក់ប៉ុណ្ណោះ ពេលនេះប្តីស្លាប់ចោលទៀត។ ហើយនៅវេលាម៉ោង៤ល្ងាចថ្ងៃដដែលនោះ អ្នកភូមិបានជួយរកសពឃើញយកមកធ្វើបុណ្យ ហើយម្នាក់ៗមានក្ដីអាណិតអាសូរគ្រួសារនេះយ៉ាងខ្លាំង ដែលពេលនេះបុរសជាប្ដីឈ្មោះ សុខ រ៉ា អាយុ៣៨ឆ្នាំ លង់ទឹកស្លាប់ ឯប្រពន្ធនិងកូនៗសុទ្ធតែពិការភ្នែក ម្នាក់ៗទាល់តែនៅជិតគ្នាណាស់ ទើបមើលគ្នាឃើញ៕