មិនគួរសោះ!!! ស្រីស្អាតម្នាក់ ជិះម៉ូតូបុកបង្កាន់ដៃស្ពាន រួចបានផ្លោងធ្លាក់ចុះទៅក្រោម បណ្តាលឲ្យស្លាប់បាត់ទៅហើយ

ខេត្តកណ្តាល​​៖ មាន​គ្រោះថ្នាក់​ចរាចរណ៍​នេះកើតឡើងនៅវេលាម៉ោង​០៦:២០នាទីយប់ ថ្ងៃទី១០ ខែមីនា​ ឆ្នាំ​២០១៨ កាលពីម្សិលមិញនេះ ​នៅចំណុចលើស្ពានព្រែកក្ដាម (ស្ពានមិត្តភាព កម្ពុជា-ចិន) ភូមិទួលងោក ឃុំកំពង់លួង‌ ស្រុកពញាឮ ខេត្តកណ្ដាល ដោយគេឃើញនារីរូបស្រស់ម្នាក់ជិះម៉ូតូ Scoopy ពណ៍ស ពាក់ស្លាកលេខ​ភ្នំពេញ​ 1GM-4651 មិនពាក់មួកសុវត្តិភាព ទៅបុកបង្កាន់ដៃស្ពាន រួចបានផ្លោងធ្លាក់ចុះទៅក្រោមស្ពានព្រែកក្តាម​ បណ្ដាលឲ្យមានមនុស្សរងរបួសធ្ងន់​ ហើយត្រូវបាន​បញ្ចូនទៅកាន់មន្ទីរពេទ្យកាល់ម៉ែត្រសង្រ្គោះបន្ទាន់​ ។

ក្រោយពីទទួលបានដំណឹងភ្លាម លោក ឈ្មោះ ជួន ផង់ ដែលជាឪពុកជនរងគ្រោះ បានទៅដល់មន្ទីរពេទ្យកាល់ម៉ែត្រហើយនៅវេលាម៉ោងជិត១១យប់ ថ្ងៃដដែលនេះ ហើយគាត់បញ្ជាក់ថាយុវតីរងគ្រោះពិតជាកូនស្រីគាត់មែន ឈ្មោះ​ ជួន សិលា អាយុ២១ឆ្នាំ តែអកុសលកូនស្រីគាត់បានដាច់ខ្យល់ស្លាប់នៅមន្ទីរពេទ្យបាត់ទៅហើយ។

សាច់ញាតិ​ជនរងគ្រោះបានប្រាប់ឲ្យដឹងទៀតថា យុវតីរងគ្រោះ ទើបមកពីស្រុកកំណើត ដើម្បីចូលរួមបុណ្យបច្ច័យបួនរបស់លោកយាយ ប៉ុន្តែពេលត្រឡប់មកវិញ បែរជួបរឿងអកុសលបណ្ដាលឲ្យស្លាប់បាត់បង់ជីវិតតាមផ្លូវបែបនេះ។

ក្រោយពេលកើតហេតុ កម្លាំងសមត្ថកិច្ចជំនាញ បានចុះធ្វើកំណត់ហេតុ ហើយសាកសពត្រូវវបានបញ្ជូនដល់ផ្ទះហើយ ដែលស្ថិតនៅក្នុងភូមិស្ទឹងស្ងួត ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង នាវេលាម៉ោង១៖៣០រំលងអធ្រាត្រឈានចូលថ្ងៃទី១១ ខែមីនា ឆ្នាំ២០១៨នេះ ដើម្បីឲ្យក្រុមគ្រួសារយកទៅធ្វើបុណ្យតាមប្រពៃណី។ ចំណែកឯម៉ូតូត្រូវសមត្ដកិច្ចយកមករក្សាទុកនៅអធិការដ្ឋាននគរបាលស្រុកពញាឮ រងចាំសាច់ញាតិយកឯកសារមកយកម៉ូតូវិញ៕