លម្អិត!!! ពិតជារំភើបណាស់ នៅពេល ឯកឧត្ដម ខៀវ កាញារឹទ្ធ ធ្វើរឿងមួយនេះជូន លោក ចៅ ចាន់ណារី

លោក ចៅ ចាន់ណារី គឺជាអតីតតារាសម្ដែងក្នុងទសវត្សរ៍ទី ៩០ ជាមួយអ្នកស្រី អម្ពរ ទេវី ទេព រិនដារ៉ូ ។ បច្ចុប្បន្នលោក កំពុងតែរស់នៅក្នុងខេត្តក្រចេះ ក្នុងសភាពក្រីក្រខ្លាំង ដោយដំណឹងនេះ ទើបតែផ្ទុះឡើងកាលពីពេលថ្មីៗនេះ តាមរយៈនាយ កុយ ដែលបានទៅជួបលោកផ្ទាល់ គ្រាដែលតារាកំប្លែងជើងចាស់រូបនេះ ទៅសម្ដែងសិល្បៈនៅទីនោះ។

ក្នុងនោះផងដែរបើយោងតាមហ្វេសប៊ុករបស់លោក ផែង វណ្ណៈ ដែលគាត់បានបង្ហោះកាលពីម្សិលមិញនេះ នូវដំណឹងដ៏រំភើបមួយដែលលោកបានទទួលពី ឯកឧត្ដម ខៀវ កាញារឹទ្ធ រដ្ឋមន្ត្រីក្រសួងព័ត៌មាន ដោយក្នុងនោះ លោកបានបញ្ជាក់ថា៖

"ឯកឧត្ដម ខៀវ កាញារឹទ្ធ រដ្ឋមន្ត្រីក្រសួងព័ត៌មាន និង លោកជំទាវ ឧបត្ថម្ភថវិកា ៥០០ ដុល្លារ និងធានាសង់ផ្ទះបង្ហើយជូនតារាភាពយន្តជើងចាស់ ចៅ ចាន់ណារី

ក្នុងឱកាសចូលជួបជូនពរ ឯកឧត្ដម ខៀវ កាញារឹទ្ធ និង លោកជំទាវ នៅថ្ងៃនេះ ខ្ញុំបានគោរពរាយការណ៍ជូនឯកឧត្ដម និង លោកជំទាវ អំពីស្ថានភាពរបស់លោកពូ ចៅ ចាន់ណារី អតីតតារាភាពយន្តដ៏ល្បីល្បាញប្រចាំទសវត្ស៨០-៩០ ដែលកំពុងរស់នៅក្នុងស្ថានភាពលំបាក ឯកឧត្ដម និង លោកជំទាវ បានឧបត្ថម្ភថវិកា ៥០០ ដុល្លារ តាមរយៈក្រុមរួបរួមមិត្តដើម្បីការងារមនុស្សធម៌យើងខ្ញុំទុកជូនដល់លោកពូចៅ ចាន់ណារី ។

បន្ថែមពីលើទឹកប្រាក់ឧបត្ថម្ភនេះទៀត ឯកឧត្ដម ខៀវ កាញារឹទ្ធ និង លោកជំទាវ ទេព រង្សី បានអោយខ្ញុំដឹងថា បើលោកចៅ ចាន់ណារី សាងសង់ផ្ទះតែមិនទាន់ហើយដោយខ្វះថវិកា ឯកឧត្ដម និង លោកជំទាវ នឹងទទួលរ៉ាប់រងជួយសង់បង្ហើយជូនទាំងអស់តែម្ដង ។

បន្ទាប់ពីបានដំណឹងនេះ ខ្ញុំបានទូរស័ព្ទជំរាបទៅលោកពូ ចៅ ចាន់ណារី គាត់បានឆ្លើយតបដោយសេចក្ដីគោរពដឹងគុណ និង អរគុណ ចំពោះ ឯកឧត្ដម ខៀវ កាញារឹទ្ធ និង លោកជំទាវ និង និយាយទាំងអួលដើមករព្រមទាំងទឹកភ្នែកស្រក់ដោយមិនដឹងខ្លួន ។ ខ្ញុំស្ដាប់ហើយពិតជារំជួលចិត្តអាណិតគាត់ស្ទើរស្រក់ទឹកភ្នែក ។

ខ្ញុំបាទជួសមុខអោយលោកពូ ចៅ ចាន់ណារី សូមគោរពថ្លែងអំណរគុណជូនចំពោះ ឯកឧត្ដម ខៀវ កាញារឹទ្ធ និង លោកជំទាវ ដែលជានិច្ចកាល តែងតែយកចិត្តទុកដាក់ជួយទុករគតជន ចាស់ជរា កុមារកំព្រា ជនពិការ និង តារាសិល្បៈចាស់ៗដែលមានការខ្វះខាត ។

សូមគោរពជូនពរ ឯកឧត្ដម និង លោកជំទាវ ជួបប្រទះតែពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លងឃ្លាតឡើយ ។"៕