ទីបំផុត បងប្រុស ខេមរៈ សិរីមន្ត ក្លាយជាឧត្ដមសេនីយ៍បាត់

កាលពីម្សិលមិញនេះមានការភ្ញាក់ផ្អើលជាខ្លាំងពីមហាជន ដោយមានបុរសម្នាក់បានបង្ហោះសារមួយជូនពរលោក ខេមរៈ ភារុណ ដែលត្រូវជាបងប្រុសបង្កើតរបស់លោក ខេមរៈ សិរីមន្ត ដោយសរសេរថា៖"សូមអបអរសាទរ និងជូនពរលោក ខេមរៈ ភារុណ ដែលរាជរដ្ឋាភិបាលដំឡើងឋានៈជាឧត្តមសេនីយ៍។ សូមបន្តទទួលជោគជ័យ!"។ ក្នុងនោះផងដែរគេក៏បានឃើញលោក ខេមរៈ ភារុណ ក៏បានបង្ហោះរូបថត៣សន្លឹកផងដែរ ព្រមទាំងលោកបានសរសេរសារខ្លីមួយថា៖ "ថ្ងៃនេះសប្បាយចិត្តណាស់បានភរិយាខ្ញុំថតរូបអោយមិនងាយទេ។"។

ពាក់ព័ន្ធករណីខាងលើនេះលោក ខេមរៈ ភារុណ បានឲ្យដឹងថាគឺជារឿងពិត ខ្លួនត្រូវបានព្រះមហាក្សត្រ និងរាជរដ្ឋាភិបាលចេញព្រះរាជក្រឹត្យតម្លើងឋានន្តរសក្ដិពីសក្ដិ៥ ទៅជាឧត្ដមសេនីយ៍ផ្កាយ១ កាលពីថ្ងៃទី ២៩ ខែ មីនា ឆ្នាំ ២០១៨ កន្លងទៅថ្មីៗនេះ។

ជាមួយនឹងក្ដីរំភើបសប្បាយរីករាយឥតឧបមាលោក ខេមរៈ ភារុណ បាននិយាយថា៖" បានឥឡូវហ្នឹងខ្ញុំគឺជាឧត្ដមសេនីយ៍ផ្កាយ១ នៅក្រសួងការពារជាតិ ហើយខ្ញុំពិតជាសប្បាយរីករាយយ៉ាងខ្លាំង ព្រោះមិននឹកស្មានថាជាតិនេះបានទទួលងាជាឧត្ដមសេនីយ៍អ៊ីចឹងទេ។ ខ្ញុំសូមអរព្រះគុណដល់ព្រះមហាក្សត្រ និងអរគុណដល់រាជរដ្ឋាភិបាល ដែលចេញព្រះរាជក្រឹត្យតម្លើងឋានន្តរសក្ដិដល់រូបខ្ញុំបាទ"៕