ដឹងតែល្បីមិនខានទេ ព្រោះរឿងភាគ «កូនពស់កេងកង» នេះ ប្រមូលផ្តុំដោយតារាសម្តែងចាស់ថ្មីល្បីៗស្ទើរមួយប្រទេសទៅហើយនោះ

កាលពីពេលថ្មីៗនេះគេឃើញក្នុងហ្វេសប៊ុករបស់លោក ហ្វៃ សំអាង ដែលត្រូវបានមហាជនទូទៅស្គាល់លោកថាគឺជាអ្នកដែលដឹកនាំ និងនិពន្ធរឿងមួយរូបដែលមានស្នាដៃខ្ពស់ លោកបានបង្ហោះរូបភាពពីសកម្មភាពក្នុងការថតរឿងភាគថ្មី គឺរឿង "កូនពស់កេងកង" ដែលផលិតឡើងយ៉ាងសំរិតសម្រាំងសម្រាប់ទូរទស្សន៍ហង្សមាស ហើយក៏នឹងចាក់បញ្ចាំងក្នុងឆ្នាំ២០១៨នេះ តែម្តង ដែលជាការនិពន្ធរឿងដោយ លោកហ្វៃ សំអាង និងលោកស្រី ប៉ុល ពិសី ដឹកនាំរឿង លោកហ្វៃ សំអាង។

គួរបញ្ជាក់ឡើងវិញផងដែរថា កាលពីពេលកន្លងទៅនេះ លោក ហ្វៃ សំអាង បានថ្លែងប្រាប់សារព័ត៌មានក្នុងស្រុកមួយថា រឿង "កូនពស់កេងកង" នេះមានរហូតដល់ទៅចំនួន ២៥ភាគឯណោះ។ ចំណែកខាងក្រោមនេះវិញគឺជាសកម្មភាពខ្លះៗក្នុងឆុតឆាករឿងមួយនេះ ដោយគ្រាន់តែមើលសកម្មភាពនេះក៏ដឹងថារឿងមួយនេះពិតជាល្អមើលផងដែរ។

តាមព័ត៌មានបានឱ្យដឹងថា ក្នុងខ្សែរឿងភាគខ្មែរនេះមួយបានចំណាយដើមទុនយ៉ាងច្រើន ក្នុងនោះទាំងទីតាំងថត ទិដ្ឋភាពមួយចំនួនធំ ព្រមទាំងតួសម្តែងជាដើម ត្រូវបានរៀបចំយ៉ាងសម្រិតសម្រាំងបំផុត ធ្វើយ៉ាងណាដើម្បីឱ្យសាច់រឿងចេញមកមានការចាប់អារម្មណ៍ខ្ពស់ ។ យ៉ាងណាក្នុងសាច់រឿង "កូនពស់កេងកង" ទាំងមូលត្រូវបានគេរំពឹងថា នឹងទទួលបានការទស្សនាច្រើន ព្រោះបានប្រជុំទៅដោយតារាសម្តែង ប្រុស ស្រី ក្មេង ចាស់ ល្បីៗច្រើនរូបចូលរួមសម្តែង ដើម្បីញ៉ាំងសាច់រឿងមួយនេះកាន់តែល្អមើល និងទទួលបានការចាប់អារម្មណ៍។ ដូចនេះដើម្បីចង់ដឹងកាន់តែច្បាស់ថា ក្នុងខ្សែរឿងភាគ "កូនពស់កេងកង" មានតួសម្តែងល្បីៗណាខ្លះ សូមទស្សនារូបភាពខាងក្រោមនេះ៕