ដោយសារតែរឿងមួយនេះហើយ ទើបធ្វើឲ្យសម្តេចតេជោ ហ៊ុន សែន ព្រមានដល់អ្នកសារព័ត៌មាន

ប្រធានគណបក្សប្រជាជនកម្ពុជាដែលកំពុងដឹកនាំរដ្ឋាភិបាលអាណត្តិទី៥ លោកនាយករដ្ឋមន្រ្តី ហ៊ុន សែន បានបញ្ចេញសារមួយដោយហាមប្រាមអ្នកកាសែតថា មិនអោយសរេសរអ្វីដែលអាចបណ្ដាល អោយកើតមានបដិវត្តណ៍ពណ៌នៅកម្ពុជានោះទេ ។

លោកនាយករដ្ឋមន្រ្តី ហ៊ុន សែន បានបញ្ជាក់អោយដឹងថា សារព័ត៌មានពិតជាអាវុធមុខពីរ ប្រសិនបើការសេរីភាពប្រកបដោយវិជ្ជាជីវៈ និងក្នុងក្របខណ្ឌច្បាប់ សារព័ត៌មានពិតជាបានចូលរួមចំណែកក្នុងការជួយលើកស្ទួយលទ្ធិប្រជាធិបតេយ្យ ការគោរពសិទ្ធិមនុស្ស ការកសាងសន្តិភាព ស្ថិរភាពនយោបាយ និងការអភិវឌ្ឍប្រទេសជាតិ ។

ប៉ុន្តែផ្ទុយទៅវិញលោកយល់ថា ប្រសិនណាបើការប្រើប្រាស់សេរីភាពហួសព្រំដែនដោយបំពានច្បាប់ សារព័ត៌មានពិតជាបានបំផ្លាញលទ្ធិប្រជាធិបតេយ្យ បំផ្លាញសុខសន្តិភាព និងការអភិវឌ្ឍជាតិ ហើយរុញច្រានឲ្យប្រទេសធ្លាក់ក្នុងភ្លើងសង្គ្រាមយ៉ាងពិតប្រាកដ‍ ។

លោកនាយករដ្ឋមន្រ្តី ហ៊ុន សែន អោយដឹងបែបនេះ ធ្វើឡើងនៅក្នុងសារលិខិតរបស់លោក សម្រាប់ផ្ញើជូនទៅ «វេទិកានិពន្ធនាយកសារព័ត៌មានកម្ពុជា» ដែលបានរៀបចំនៅថ្ងៃទី ២៥ ខែវិច្ឆិកា ឆ្នាំ២០១៧នេះ។

នៅក្នុងសារលិខិតរបស់លោកនាយរកដ្ឋមន្រ្តី ហ៊ុន សែន ដែលបានធ្វើឡើងសារលិខិតរបស់លោកនាយករដ្ឋមន្ត្រី ហ៊ុន សែន ចុះថ្ងៃទី២៣ ខែវិច្ឆិកា ឆ្នាំ២០១៧ បានអោយដឹងបែបព្រមានថា រាជរដ្ឋាភិបាល នឹងមិនអនុញ្ញាតឲ្យមានការប្រើប្រាស់សេរីភាពតាមបែបអនាធិបតេយ្យដោយបំពានច្បាប់ ដើម្បីធ្វើបដិវត្តន៍ពណ៌ផ្តួលរំលំរាជរដ្ឋាភិបាលកម្ពុជា ស្របច្បាប់ជាដាច់ខាត។

បើតាមសារលិខិតបានបញ្ជាក់អោយដឹងថា វិស័យនេះមានការរីកចម្រើនយ៉ាងឆាប់រហ័ស ដែលរហូតមកដល់បច្ចុប្បន្ន មានអង្គភាពសារព័ត៌មានជាតិ និងអង្គភាពសារព័ត៌មានបរទេសដែលកំពុងធ្វើការផ្សព្វផ្សាយនៅក្នុងព្រះរាជាណាចក្រកម្ពុជាចំនួន៥៣០អង្គភាព ។

ក្នុងនោះមានដូចជាកាសែតផ្សាយជាភាសាខ្មែរមានចំនួន ១៣៩អង្គភាព កាសែតផ្សាយជាភាសាបរទេសមានចំនួន ៤៣អង្គភាព ទស្សនាវដ្ដីមានចំនួន៣០៦អង្គភាព ព្រឹត្តិបត្រព័ត៌មានចំនួន៤២អង្គភាព។ ចំណែកវិទ្យុមានចំនួន២១១ស្ថានីយ ទូរទស្សន៍អនឡាញមានចំនួន៥៨អង្គភាព និងការិយាល័យតំណាងទីភ្នាក់ងារសារព័ត៌មាន ការិយាល័យតំណាងវិទ្យុ-ទូរទស្សន៍បរទេសប្រចាំការអចិន្ត្រៃយ៍មានចំនួន ២១អង្គភាពជាដើម ៕