ពិតជាសាហាវណាស់ មានអ្នកស្លាប់ដល់ទៅ៦នាក់ ក្នុងគ្រោះថ្នាក់ចរាចរណ៍មួយ នៅ ស្រុកក្រគរ ខេត្តពោធិ៍សាត់

សេចក្តីរាយការណ៍បានឲ្យដឹងថា គ្រោះថ្នាក់ចរាចរណ៍ខាងលើនេះ បានកើតឡើងនៅម៉ោង០៤៖៤០នាទីល្ងាច​ ថ្ងៃទី០២​ ខែមករា​ ឆ្នាំ២០១៨​ នៅលើបណ្តោយជាតិលេខ៥​ ចន្លោះគីឡូម៉ែត្រលេខ១៥៩​ និង១៦០​ ស្ថិតក្នុងភូមិសារវ័ន្ត ឃុំស្នាអន្សា ស្រុកក្រគរ ខេត្តពោធិ៍សាត់។

ហេតុការណ៍គ្រោះថ្នាក់ចរាចរណ៍ដ៏រន្ធត់ រថយន្តម៉ាក KIA របស់ក្រុមហ៊ុន Capitol ដឹកអ្នកដំណើរ បានបុកជាមួយរថយន្តម៉ាក Toyota Corola របស់ប្រធានក្រុមប្រឹក្សាខេត្តពោធិ៍សាត់​ រួចរេចង្កូតទៅបុករះចំទ្រូងរថយន្តម៉ាក​ HYUNDAI​ ដែលសណ្តោងកុងតឺន័រ នៅពេលនេះ អ្នកស្លាប់កើនឡើងដល់​៦នាក់ ខណៈអ្នករងរបួសធ្ងន់ចំនួន៥នាក់។

លោក​ ឯម​ រុន​ អធិការនគរបាលស្រុកក្រគរ​បានប្រាប់ឲ្យដឹងថា​ ជនរងគ្រោះបាន​បាត់បង់ជីវិតចំនួន០៦នាក់​។ លោកបានបន្ថែមទៀតថា​ យោងចម្លើយសាក្សី​ដែលនៅជិតកន្លែងកើតហេតុ បានបំភ្លឺថាគឺ រថយន្តក្រុងម៉ាក KAI​ ពណ៌ស ខៀវ របស់ក្រុមហ៊ុន Capitol ពាក់ផ្លាកលេខ​ ភ្នំពេញ 3B-6165 ធ្វើដំណើរពីកើតទៅលិច (អ្នកបើកបរគេចខ្លួន)​ បានបុកជាមួយ​រថយន្តម៉ាក Toyota Corola ​ពណ៌ប្រផេះ​ ពាក់ស្លាកលេខភ្នំពេញ 2D-7437 ធ្វើដំណើរពីលិចទៅកើត បើកបរដោយឈ្មោះ សុទ្ធ តារា ភេទប្រុស​ រស់នៅឃុំអន្លង់ត្នោត ស្រុកក្រគរ ខេត្តពោធិ៍សាត់ ប្រធានក្រុមប្រឹក្សាស្រុកក្រគរ (រងរបួសធ្ងន់)​ បញ្ជូនដល់មន្ទីរពេទ្យខេត្តពោធិ៍សាត់ (ស្លាប់)។​

ភ្លាមនោះរថយន្ត KAI បានរេចង្កូតទៅបុករះចំទ្រូងរថយន្តម៉ាក HYUNDAI​ មួយគ្រឿងទៀត ពណ៌ស ពាក់ស្លាកលេខព្រះសីហនុ 3A-3464 ធ្វើដំណើរពីលិចទៅកើត​ (អ្នកបើកបររត់គេចខ្លួន)​ ចំផ្នែកខាងឆ្វេង បណ្តាលឲ្យរថយន្តក្រុងធ្លាក់ផ្លូវ ខូចជញ្ជាំងផ្នែកខាងស្តាំមួយចំហៀងទាំងស្រុង។

បច្ចុប្បន្នជនរងគ្រោះកំពុងសង្ក្រោះបន្ទាន់ នៅមន្ទីរពេទ្យខេត្តពោធិ៍សាត់។ ដោយឡែកសាកសពទាំង៦នាក់ បានប្រគល់ជូនក្រុមគ្រួសារដើម្បីធ្វើបុណ្យតាមប្រពៃណី។ ចំណែករថយន្តទាំង៣គ្រឿង​ ត្រូវបានសមត្ថកិច្ចជំនាញចុះធ្វើការវាស់វែង យកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តពោធិ៍សាត់​ រង់ចាំភាគីទាំងសងខាងចូលខ្លួនដោះស្រាយគ្នា តាមច្បាប់នៅពេលក្រោយ៕