ម្ចាស់សណ្ឋាគារ ណាណា ឲ្យគេដឹកសពចេញតាមទ្វារក្រោយ ដោយព្យាយាមលាក់បាំង តែទីបំផុត...

រាជធានីភ្នំពេញ ៖ ករណីមនុស្សស្លាប់ម្នាក់យ៉ាងអាថ៌កំបាំងបំផុតនៅក្នុងសណ្ឋគារ ណាណា ដោយមិនមានអ្នកណាម្នាក់បានផ្តល់ព័ត៌មានថា (កើតឡើងដោយឃាតកម្ម ឬក៏យ៉ាងណានោះឡើយ) បានអាជ្ញាធរមូលដ្ឋាន និងម្ចាស់ទីតាំងខាងលើព្យាយាមលាក់បាំង តាំងពីថ្ងៃរហូតដល់យប់ទើបលួចដឹកចេញតាមទ្វារក្រោយ។ ករណីនេះដែរបានបង្កឱ្យមានការភ្ញាក់ផ្អើលកើតឡើងនៅវេលាម៉ោង៥ និង៣០នាទីល្ងាច ថ្ងៃទី ១៦ ខែវិច្ឆិកា ឆ្នាំ២០១៧ នៅសណ្ឋាគារ ណាណា ទីតាំងលេខ 1B-2B និង42 ផ្លូវលេខ១៥៤ ខាងជើងផ្សារសូរិយាម៉ល ក្នុងសង្កាត់ផ្សារថ្មីទី៣ ខណ្ឌដូនពេញ។

តាមប្រភពព័ត៌មានពីប្រជាពលរដ្ឋដែលនៅក្បែរខាងបានប្រាប់ឱ្យដឹងថា មានការភ្ញាក់ផ្អើលមួយបានកើតឡើងដោយមានមនុស្សស្លាប់នៅក្នុងសណ្ឋាគារ ណាណា ខាងលើ ដោយមានកម្លាំងមានសមត្ថកិច្ច និងរថយន្តពេទ្យមួយគ្រឿងចូលតាមច្រកទ្វារខាងក្រោយយ៉ាងតក់ក្រហល់ក្នុងគោលបំណងមកដឹកជនរងគ្រោះចេញហើយមើលទៅ?

ពេលដែលរថយន្តពេទ្យមួយគ្រឿងនោះចូលទៅបានបន្តិចក៏គេបានឃើញបើកចេញទៅវិញ រហូតមកដល់ពេកមេឃងងឹតទៅហើយនៅម៉ោងប្រមាណ៧យប់ ក៏ស្រាប់តែមានរថយន្តពេទ្យមួយគ្រឿងទៀត ចូលតាមច្រកទ្វារក្រោយដដែល និងលើកសាកសពមួយដែលគេបានរុំថង់ប្លាស្ទិកជិតឈឹងលើកដាក់ក្នុងរថយន្ត ហើយដឹកចេញយកទៅបាត់ស្រមោលដោយមិនមានអ្នកណាម្នាក់បានដឹងថា ជនរងគ្រោះនោះជាជនជាតិខ្មែរ ឬក៏បរទេសឡើយ ហើយក៏មិនបានដឹងថា ស្លាប់ដោយសារអ្វីឡើយដែរ។

ពាក់ព័ន្ធទៅនឹងករណីមនុស្សស្លាប់នៅក្នុងសណ្ឋាគារ ណាណា យ៉ាងអាថ៌កំបាំងនេះដែរ លោក កុល ខាន់ណារ៉ា នាយប៉ុស្តិ៍ផ្សារថ្មីទី៣ បានប្រាប់តាមទូរស័ព្ទថា ក្នុងករណីនេះដែរលោកមិនបានដឹងឡើយ ដោយរូបលោកជាប់រវល់រើបារ៉ាស់នៅម្តុំតុលាកាកំពូល និងតម្រូវឲ្យសួរទៅលោកអធិការនគរបាលខណ្ឌដូនពេញវិញ។ ក្រោយពីទទួលបាននូវចម្លើយអំពីសំណាក់លោកនាយប៉ុស្តិ៍ខាងលើរួចហើយ អ្នកយកព័ត៌មានក៏បានទូរស័ព្ទទៅលោក ហួត ចាន់យ៉ារ៉ាន់ អធិការនគរបាលខណ្ឌដូនពេញចូលដែរ តែមិនលើកឡើយ ទំនងជាលោកជាប់រវល់ហើយមើលទៅ។

ពាក់ព័ន្ធទៅនឹងករណីមនុស្សស្លាប់នៅក្នុងសណ្ឋាគារ ណាណា ខាងលើនេះដែរ គេមិនបានដឹងថា ជាជនជាតិខ្មែរ ឬក៏ជនបរទេសឡើយ ហើយក៏មិនបានដឹងថាស្លាប់ដោយសារករណីឃាតកម្ម ឬក៏ស្លាប់ដោយសារអ្វីឡើយ ព្រោះមិនមានអ្នកណាម្នាក់បញ្ជាក់ប្រាប់ឡើយ និងហាក់បីដូចជាមានការលាក់លៀមយ៉ាងខ្លាំងផងដែរ៕