សូមមេត្តាប្រុងប្រយ័ត្ន ព្រោះរកឃើញសត្វមាន់ចំនួន ២ក្បាលមានផ្ទុកជំងឺផ្តាសាយបក្សី ប្រភេទ H5N1 នៅខេត្តកំពង់ចាម

តាមសេចក្តីរាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានរកឃើញសត្វមាន់ចំនួន ២ក្បាល ពីភូមិកោះស្វាយ ស្រុកព្រៃឈរ ខេត្តកំពង់ចាម មានផ្ទុកជំងឺផ្តាសាយបក្សី ប្រភេទ H5N1។ ការរកឃើញនេះ បានធ្វើឡើងតាមរយៈការធ្វើវិភាគមេរោគផ្តាសាយបក្សី បន្ទាប់ពីមាន សត្វមាន់ឈឺ និងងាប់ ប្រមាណ ២០០ក្បាល នៅក្នុងភូមិឃុំស្រុកខាងលើនេះ។

វាជាសញ្ញាប្រកាសអាសន្នមួយ ដែលបានញុំាងឲ្យក្រសួងកសិកម្ម រុក្ខាប្រមាញ់ និងនេសាទ ផ្ញើលិខិតដាច់ដោយឡែកចុះថ្ងៃទី ៨ធ្នូ ចំនួន ២ ទៅកាន់ប្រធានគណៈកម្មការចម្រុះខេត្តកំពង់ចាម និងទៅកាន់លោកនាយករដ្ឋមន្ត្រីហ៊ុន សែន ដើម្បីទប់ស្កាត់នូវការឆ្លងរាលដាលជំងឺផ្តាសាយបក្សី។

ក្នុងលិខិតផ្ញើទៅលោកនាយករដ្ឋមន្ត្រី និងអភិខេត្តកំពង់ចាម លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានរៀបរាប់ថា ដំណឹងពីការឈឺ និងងាប់ សត្វមាន់ប្រមាណ ២០០ក្បាល បានកើតឡើងតាំងពី ថ្ងៃទី ២៨វិច្ឆិកា ហើយក្រោយមកក្រសួង បានចាត់មន្ត្រីជំនាញរបស់អគ្គនាយកដ្ឋានសុខភាពសត្វ និងផលិតកម្មសត្វ ចុះតាមដានស្រាវជ្រាវលើករណីសង្ស័យជំងឺផ្តាសាយបក្សី នៅក្នុងតំបន់ភូមិ កោះស្វាយ ឃុំត្រពាំងព្រះ ស្រុកព្រៃឈរ ខេត្តកំពង់ចាម។

ក្រោយមកក្រុមមន្ត្រីបច្ចេកទេស បានប្រមូលយកសំណាកពីសត្វមាន់ ២ក្បាល យកទៅវិភាគ ហើយរកឃើញថាមានវត្តមានវីរុសផ្តាសាយបក្សីប្រភេទ H5N1 ដោយយោងតាមលទ្ធផលកាលពីថ្ងៃទី ៦ធ្នូ។ ភ្លាមៗ ក្រុមមន្ត្រី បានធ្វើការផ្សព្វផ្សាយ ណែនាំដល់កសិករ ភ្នាក់ងារសុខភាពសត្វភូមិ និងអាជ្ញាធរភូមិ ឃុំ អំពើគ្រោះថ្នាក់នៃជំងឺផ្តាសាយបក្សី និងវិធានាការពារ។

ក្រសួងកសិកម្ម ចង់ឲ្យអភិបាលខេត្តកំពង់ចាម និងអាជ្ញាធរមូលដ្ឋាន សហការពង្រឹងទប់ស្កាត់ចលនាបក្សី និងផលិតផលមានដើមកំណើតពីបក្សីជាបណ្តោះអាសន្ន ក្នុងតំបន់ដែលផ្ទុះជំងឺឆ្លងខាងលើ ដើម្បីអនុវត្តវិធានបច្ចេកទេសបសុពេទ្យប្រកដដោយប្រសិទ្ធភាពខ្ពស់។

គួរជម្រាបជូនថា កាលពីដើមឆ្នាំ២០១៧នេះ ក្រសួងកសិកម្ម ក៏ធ្លាប់បានរាយការណ៍ ថាមានការផ្ទុះរីករាលដាលឡើងវិញនៃជំងឺផ្តាសាយបក្សី លើសត្វមាន់ ទា ក្នុងខេត្តចំនួនពីរ គឺ ខេត្តកំពង់ធំ និង ខេត្តស្វាយរៀង ដែលប៉ះពាល់សត្វទា ប្រមាណ ៣០០០ក្បាល និងមាន់ ជិត ៣០០ក្បាល។ ហើយពេលនោះ ក្រសួងបានដាក់ការប្រកាសអាសន្ន ក្នុងតំបន់ឆ្លងនៃខេត្តទាំង ២ រយៈពេល ១ខែ ដោយមិនឲ្យមានចរាចរលក់ដូរ ឬ ចិញ្ចឹមប្រភេទបក្សីទាំងនោះឡើយ ដើម្បីត្រួតពិនិត្យពីស្ថានភាពជំងឺផ្តាសាយបក្សី៕