ក្តៅៗ!!! ទីបំផុតបានឃាត់ខ្លួននគរបាល ២រូប ករណីបង្រ្កាបសង្វៀនជល់មាន់ ដែលបាន​ផ្ទុះអាវុធបណ្តាលឲ្យបុរសម្នាក់ស្លាប់ភ្លាមៗ (មានវីដេអូ)

រាជធានីភ្នំពេញ ៖ អគ្គស្នងការរងនគរបាលជាតិ លោកនាយឧត្តមសេនីយ៍ ជួន សុវណ្ណ និងស្នងការនគរបាលរាជធានីភ្នំពេញ បានប្រកាសចាត់វិធានការនគរបាល ចំនួន​ ២រូប ចំពោះមុខជុំវិញករណីនគរបាលខណ្ឌពោធិ៍សែនជ័យ ចុះបង្រ្កាបកន្លែងបញ្ជល់មាន់ និងបណ្តាលឲ្យប្រជាពលរដ្ឋម្នាក់ស្លាប់ កាលពី​វេលាម៉ោង ១១ និង ១៥នាទី ព្រឹកថ្ងៃទី២១ ខែមករា ឆ្នាំ២០១៨ នៅចំណុចក្រោយផ្សារកាណាសុីធី ស្ថិតក្នុងភូមិចោមចៅ សង្កាត់ចោមចៅ២ ខណ្ឌពៅធិសែនជ័យ ។​

លោកស្នងការ បានគូសបញ្ជាក់ថា “យើងបាននាំខ្លួនមន្រ្តីនគរបាល​ ២រូប ដែលប្រើប្រាស់អាវុធក្នុងកិច្ចប្រតិបត្តិការល្បែងស៊ីសងនេះ មកកាន់ស្នងការដ្ឋាននគរបាលរាជធានីភ្នំំពេញ ព្រមទាំងដកហូតអាវុធ ចំនួន ២ដើម ដើម្បីធ្វើកោសល្យវិច្ឆ័៏យទៅលើសម្បកគ្រាប់ ដែលយកពីកន្លែងបង្រ្កាប និងក្បាលគ្រាប់ដែលវះយកចេញពីសាកសព ដើម្បីធ្វើកោសល្យវិច្ឆ័យថា តើអាវុធមួយណា ដែលជាបង្កហេតុឲ្យប្រជាពលរដ្ឋ រងគ្រោះស្លាប់” ។

ក្រោយការផ្ទុះអាវុធ និងបណ្តាលឲ្យជនរងគ្រោះស្លាប់ ក៏មានការចាត់តាំងអភិបាលរងរាជធានីភ្នំពេញ ១រូប និងលោកអធិការនគរបាលខណ្ឌពោធិ៍សែនជ័យ ព្រមទាំងមន្រ្តីមួយចំនួន ដើម្បីចូលរួមបុណ្យសព និងចេញសោហ៊ុយសម្រាប់ការចំណាយបុណ្យ ដែលជាសំណងរដ្ឋប្បវេណី ។ យ៉ាងណាក៏ដោយ លោកនាយឧត្តមសេនីយ៍ មិនបានបញ្ជាក់អំពីអត្តសញ្ញាណមន្រ្តីនគរបាលទាំង ២រូបនោះទេ ហើយលទ្ធផលនៃការស៊ើបអង្កេត នឹងជម្រាបជូនពេលក្រោយ។

គួរបញ្ជាក់ថា ជនរងគ្រោះឈ្មោះ សៀក រ៉ន ភេទប្រុស អាយុ ៣៣ឆ្នាំ មុខរបរ កម្មកររោងចក្រ មានស្រុកកំណើតនៅខេត្តកំពង់ស្ពឺ បច្ចុប្បន្ន ស្នាក់នៅបន្ទប់ជួលភូមិចោមចៅ សង្កាត់ចោមចៅ២ ខណ្ឌពោធិ៍​សែនជ័យ។ បើតាមប្រពន្ធជនរងគ្រោះឈ្មោះ ណុប ផានី បានអោយដឹងថា ជនរងគ្រោះបានមកពីហូបកាហ្វេ ហើយបានឡើងទៅបន្ទប់ជួលរបស់គាត់ និងបានអើតមើលគេជល់មាន់ ពេលនោះ ស្របពេល ដែលនគរបាលចុះបង្រាបសង្វៀនជល់មាន់នោះ ក៏បានបាញ់ឡើងទៅលើជាច្រើនគ្រាប់ ក៏បណ្ដាលអោយត្រូវជនរងគ្រោះចំបំពង់.ក ១កន្លែង និងកដៃស្ដាំ ១កន្លែង ហើយប្រពន្ធជនរងគ្រោះបានហៅរថយន្ដពេទ្យ សម្ពពអង្គរ ដឹកជនរងគ្រោះទៅសង្គ្រោះ បានប្រហែលជា ៥នាទី ជនរងគ្រោះក៏បានដាច់ខ្សល់ស្លាប់នៅក្នុងរថយន្តតែម្ដង ៕