កក្រើកទៀតហើយ នៅពេលឃើញវត្តមាន កំពូលតារាបាល់ទាត់ របស់ក្រុមបិសាចក្រហម នៅក្នុងទឹកដីកម្ពុជា (មានវីដេអូ)

កំពូលកីឡាបាល់ទាត់ Ryan Giggs របស់ក្រុមបិសាចក្រហម និងត្រូវជា Brand Ambassador របស់ក្រុមហ៊ុន Tiger បានមកដល់កម្ពុជាហើយ ដោយមានការគាំទ្រពីសំណាក់អ្នកគាំទ្រជាច្រើននាក់ នៅអាកាសយាន្តដ្ឋានអន្តរជាតិភ្នំពេញ នៅម៉ោង៩និង៣៥នាទីយប់។

ក្នុងការមកដល់នេះផងដែរលោក Ryan Giggs មានការសរសើរប្រទេសកម្ពុជាជាខ្លាំង ដោយលោកពិតជាមានការរីករាយដែលមានឱកាសបានឈានជើងចូលប្រទេសនៅតំបន់អាស៊ានមួយនេះ។ ហើយមួយវិញទៀត លោកក៏ចង់ឃើញយុវជនកម្ពុជាបង្ហាញសមត្ថភាពរបស់ពួកគេរៀងៗខ្លួន នៅក្នុងការប្រកួតនៅវគ្គផ្ដាច់ព្រ័ត្រ Tiger Street Football Festival ២០១៨ នៅថ្ងៃស្អែកនេះតែម្តង។

តាមការបញ្ជាក់ពីលោក Giggs បានឲ្យដឹងផងដែរថា លោកមកដល់ប្រទេសកម្ពុជានេះ មិនមែនជាលើកទី១នោះទេ ដោយលោកធ្លាប់បានមកម្តងរួចមកហើយ តែលោកមិនបានមកភ្នំពេញទេ គឺនៅតាមជាយដែនដែលជាប់ប្រទេសថៃឯណោះ។ ហើយពេលនោះលោកបានស្នាក់នៅក្នុងទឹកដីប្រទេសកម្ពុជាយើងប្រហែល១០ម៉ោងប៉ុណ្ណោះ។

សម្រាប់នៅថ្ងៃស្អែកនេះ លោក Giggs ដែលមានបុរសវ័យ៤៤ឆ្នាំរូបនេះ នឹងមានវត្តមាននៅទីលាន Tiger Street Football Festival ២០១៨ នៅ កោះពេជ្រ តែម្តង មុនបើកសន្នីសីទកាសែតជាផ្លូវការនៅពេលរសៀល។ ចំណែកនៅពេលល្ងាចវិញ អតីតគ្រូបង្វឹករបស់ Manchester United រូបនេះ នឹងមានការប្រកួតបង្ហាញសមត្ថភាពដែលយើងធ្លាប់ឃើញកន្លងមកខ្លះៗ ដើម្បីឱ្យអ្នកគាំទ្រទស្សនា ក៏ដូចទុកជាការដកស្រង់បទពិសោធន៍ផងដែរ៕