ក្តៅៗ ថ្មីៗ!!! កងកម្លាំងយោធាមួកខៀវកម្ពុជាម្នាក់រងរបួស បន្ទាប់ពីមានការវាយប្រហាររបស់ក្រុមឧទ្ទាម នៅម៉ាលី

ថ្ងៃទី២៤ ខែវិច្ឆិកា ឆ្នាំ២០១៧ កាលពីម្សិលមិញនេះ នៅវេលាម៉ោង ៦ ព្រឹក ម៉ោងក្នុងស្រុកម៉ាលី ត្រូវនឹងម៉ោង១២ថ្ងៃត្រង់ម៉ោងនៅក្នុងប្រទេសកម្ពុជា កងកម្លាំងយោធាមួកខៀវប្រចាំនៅតំបន់បេសកកម្មក្នុងសាធារណរដ្ឋម៉ាលីដែលហៅកាត់ថា MINUSMA ដែលបោះជំរុំបណ្តោះអាសន្ននៅតំបន់ Indelimane ស្ថិតក្នុងចម្ងាយ១១០គ.ម ពីតំបន់ Asongo បានរងការវាយប្រហារពីសំណាក់ក្រុមឧទ្ទាមបណ្តាលឱ្យកងកម្លាំងយោធាមួកខៀវកម្ពុជាមួយរូបរងរបួសស្រាល។

កងកម្លាំងយោធាមួកខៀវប្រទេសនីហ្សេចំនួនពីររូបស្លាប់នៅនឹងកន្លែងនិងកម្លាំងយោធាមួកខៀវ១៥រូបផ្សេងទៀតរងរបួស។ ដោយឡែកកងកម្លាំងម៉ាលីមួយរូបស្លាប់និងមួយរូបទៀតរងរបួស។ នេះបើតាមការផ្តល់ព័ត៌មានពីសំណាក់កងកម្លាំងមួកខៀវកម្ពុជាប្រចាំនៅតំបន់បេសកកម្មសាធារណរដ្ឋម៉ាលី។

បើតាមប្រភពព័ត៌មានដែលទទួលបាននាថ្ងៃទី២៤ ខែវិច្ឆិកា ឆ្នាំ២០១៧ ម្សិលមិញនេះដែរ បានបញ្ជាក់ថា កងយោធាមួកខៀវដែលរងរបួសក្នុងនោះមានកម្ពុជាមួយរូបដែរនោះត្រូវបានដឹកតាមឧទ្ធម្ភាគចក្ររបស់របស់កងកម្លាំងអាល្លឺម៉ង់បញ្ជូនទៅសង្គ្រោះបន្ទាន់នៅមន្ទីរពេទ្យកម្រិត២របស់កងយោធាមួកខៀវចិនប្រចាំនៅក្នុងតំបន់Gao។

តាមរយៈសារអេឡិចត្រូនិកបានបង្ហាញពីសមាសភាពរបស់កងយោធាមួកខៀវកម្ពុជាដែលរងរបួសដោយការវាយប្រហារពីសំណាក់ឧទ្ទាមនៅម៉ាលីគឺលោកអនុសេនីយ៍ឯក មុំ រិទ្ធី (Mom Rithy) រងរបួសដោយអំបែងគ្រាប់តូចៗនៅដៃ និងជើង ។ អនុសេនីយ៍ឯក មុំ រិទ្ធី នៅក្នុងកងឯកភាពកម្ទេចគ្រាប់មិនទាន់ផ្ទុះលេខ១២៣ក្នុងតំបន់បេសកកម្មMINUSMA ប្រទេសម៉ាលី។

ប្រវត្តិរូបបានបញ្ជាក់ថាៈលោកអនុសេនីយ៍ឯក មុំ រិទ្ធី ជានាយទាហានក្នុងកងឯកភាពមជ្ឈមណ្ឌលជាតិរក្សាសន្តិភាព កើតនៅថ្ងៃទី១១ ខែធ្នូ ឆ្នាំ១៩៨២ ។ ស្រុកកំណើតផ្ទះស្លា ឃុំខ្នារទទឹង ស្រុកបាកាន ខេត្តពោធិ៍សាត់ ។ ទីលំនៅបច្ចុប្បន្នៈផ្ទះស្លា ឃុំខ្នារទទឹង ស្រុកបាកាន ខេត្តពោធិ៍សាត់ ៕